ZALEN August 10, 2026: Gauhati High Court, Aizawl Bench chuan Aizawl Skywalk sakna kawnga eiruk thubuai (Prevention of Corruption Act) kal mekah, Minister hlui John Rotluangliana leh Robert Romawia Royte te laka charge siam tura hmalakna chu a hren (stay) sak rih.

He thubuai hi August 6, 2026 khan Justice Budi Habung-a chuan a ngaihtuah a. Special Judge, PC Act Aizawl-in June 24, 2026-a an laka charge siam tura hma a lakna thupek chu John Rotluangliana leh Robert Romawia Royte te hian High Court-ah an khing let a ni.

Petitioner-te ukil Adv. B. Lalramenga chuan Bharatiya Nagarik Suraksha Sanhita (BNSS), 2023 hnuaia Section 250 anga charge siam a nih hmain discharge dilna hun siamsak an nih loh thu Court hmaah a thlen a. Special Judge hian IPC Section 120B, 409, 420 leh PC Act Section 13(2) r/w Section 13(1)(a) &(b) hmangte hian thubuai chhui zui zelna tur awm tura a record tawh thu tar lan a ni a, mahse, charge fel tak a taka siam a la ni lo va. discharge dilna pawh Special Court-ah thehluh a nih tawh a, a la pending mek thu hmuh a ni bawk.

Thil awm dan hi pawmin, High Court chuan Special Court-a thubuai (SR(PCA) No. 2 of 2026)-a petitioner-te laka charge siam tura hmalakna zawng zawng chu he thubuai hi ngaihtuah a nih leh hma thleng stay sak an nih thu thupek a chhuah ta a ni. 

He thubuai hi August 17, 2026 hian ngaihtuah leh tura ruahman a ni.

He thubuaia Petitioner-te (Criminal Petition No. 22 & 23 of 2026) aiawh hian Adv. B. Lalramenga a ding a, sorkar aiawhin Addl. PP Vanneihsiami leh Mizoram Lokayukta aiawhin Special PP Mr. C. Lalfakzuala te an inlan thung niin Advocate on Record, Supreme Court JC Lalnunsanga'n a website-ah a tarlang.