ZALEN February 11, 2026: Achievers’ World leh Indian Achiever Forum-te tangkawpin an buatsaih ‘National Summit 2026 - Vikshit Bharat 2047 through Comprehensive Socio-Economic Development’, Le’ Meridien Hotel, New Delhi-a neihah vawiin khan Health & Family Welfare leh Social Welfare, Women & Child Development Minister ni bawk Lalrinpuii chuan chawimawina ‘Women Icon Award 2026’ a dawng. 

He hunah hian Shri Harsh Malhotra, Union Minister of State, Ministry of Corporate Affairs, Ministry of Road Transport and Highways, Government of India chu khuallian niin Lalrinpuii chu khualzahawm a ni.

National Summit 2026, New Delhi-a neihah hian Minister Lalrinpuii chuan thu sawiin, Mizoram tana a hnathawh avanga chawimawina an pekah lawmthu a sawi a, he award a dawn theihna chhan chu mimal hmalakna ni loin, Department officials fel tak takte nena theihtawpa ram leh hnam tana an thawh hona vang a nih thu a sawi a. Mizoram chu India rama CSR fund hmu tlem ber a nih avangin, a bikin central sawrkar-in a ngaih pawimawh em em, Health & Nutrition sector-a thawh ho puiah, he hun hmanga kalkhawm, Corporate lam hotute chu a sawm zui nghal bawk a ni.

India-in Kum 2047-ah Developed Country a nih theihna tur atana hmalakna - Mission Viksit Bharat huang chhunga tehfung pawimawh tak pakhat Healthcare sector-ah Mizoram Health Department chu an thawh that em avang te, Mizoram Universal Health Care System (MUHCS) tha tak, mi tin ban phak buatsaih a nih avang te, thingtlang mite’n zangkhai zawk leh awlsam zawka ruang an phurh theihna tura Social Walfare-in mipui tan a ruahman avang te, kum kalta chhunga Mizoram chu India ram state hrang hrang zinga kum khat hnuailam thi zat (Infant Mortality Rate) hniam berna pawl an nih theih avang te, Mizoram Health Systems Strengthening Project (MHSSP) kaltlanga Damdawi In hrang hrangte thawm that an ni leh sawrkar Damdawi In tam takte’n Damdawi In tha (quality) tehna NQAS certificate dawng theia an inhlankai avangtein he award hi Health Minister Lalrinpuii hnenah hian hlan a ni.

He hunah hian Lalrinpuii bakah kawng hrang hranga mi hlawhtlingte leh entawn tlak tak tak thlan chhuahte hnenah chawimawina hlan an ni a. Sponspor-tu TATA, SBI, Bharat Petroleum, THDC, Canara Bank, Indian Oil ten CSR kaltlanga an hnathawh hrang hrangte tarlanna hun an hmang bawk.