ZALEN, November 07, 2025: Mizoramah mipa thawmhnaw tha leh changkang zawrhna, Louis Philippe showroom hawn a nih atanga kum 12 chhungin a vawi hnih nan chei that a ni a, Zirtawpniah Rinsanga Building, Zarkawt, Aizawlah hawng thar lehin anmahni dawrtute tan hamthatna chi hrang hrang an siamsak.

Mizoram University-a thawk, Prof. Laldinliana Varte chuan ribbon chep chata a hawn rualin duhsakna a hlan a, hawn thar leh a nih atanga anmahni dawr hmasa mi 100 hnenah Rs 1,499 man T-shirt a thlawnin an pe nghal zel.

Hawnna inkhawm kaihruaitu, Mafeli Hlondo chuan hunpui pualin anmahni dawrtute tan hamthatna chi hrang hrang an siamsak tih a puang a, 2024 Youth Icon Lalsangliana leh Lilac chuan zaiin mipui an awi a, kawtthlera mipuiin an hlut hle a ni.

Kum 2013 khan Mizoramah Louis Philippe exclusive showroom hawng tanin kum 2018 khan chei that a ni tawh a, kuminah India ram puma franchise hrang hrangin dawr chhung chei dan inang kalpui turin company-in hma a la a, Mizoramah Rs. nuai 50 vel sengin an thuam tha.

Mizorama dawr neitu, Dr Franklin Lalrinngheta chuan mipa inuluk thinten an dawr nasa a, to viau tura an ngaih ang aiin a to lo a, a rawng pawh tial leh ti chiai chuai awm lo Mizo mil tak a nih avangin an duh hle tih a sawi.

Mizoramah zahawm taka incheina (formal) an hralh thei ber a, a bikin pheikhawk an hralh hnem zual a. Incheina pangngai (casual), jeans, T-shirt, necktie leh bag thlengin an kawl.

Louis Philippe thawmhnaw hi khawi lai hmun atanga lei pawh ni se fuh chiah lo a awm a nih chuan ni 15 chhungin thawmhnaw dangin a thleng leh theih a, pawisa lak let erawh a theih loh thung.

Kum 1989 khan Aditya Birla Group hnuaiah mipa thawmhnaw tha leh changkang Louis Philippe hi din a ni a, India ramah exclusive showroom 500 chuang a awm a. Hmarchhak bikah 15 chuang hawng tawhin heng zingah hian Guwahati franchise tih lohah Mizoram chu hralh tha ber a ni.

HAMTHATNA AN PEK MEKTE :

- An dawra Rs 59,999 man thil leitute hnenah Rs 299-in Trolley Bag tha chi an pe tel

- An dawra Rs 24,999 man thil leitute hnenah Rs 299-in Trolley Bag an pe tel

- An dawra Rs 16,999 man thil leitute hnenah Rs 299-in Duffel Bag an pe tel

- An dawra Rs 8,999 man thil leitute hnenah Rs 199-in Belt Wallet Combo an pe tel

- An dawra Rs 7,999 man thil leitute hnenah Rs 99-in Autolock Belt an pe tel