ZALEN February 8, 2026: Chief Minister’s Office hnuaia din Mizo Diaspora Cell chuan din a nih atangin Mizoram pawna harsatna tawk mi 30 vel a hruai haw an nei tawh a. Mizoram leh India ram pawna zin chhuak leh hnathawkte chu dan zawm tha turin a hriattir nawn.

Mizo Diaspora Cell hotute hnen atanga ZALEN thudawn danin, Mizoram pawn leh ram pawn (foreign)-a harsatna hrang hrang tawk Mizo 30 bawr vel chu an hmalaknain Mizoramah hruai an ni tawh a, ram pawna case langsar zualte chu Dubai, Maldives, Nepal, China, Malaysia-ah te an ni a. Tam tak chu passport lem hmanga Myanmar kaltlanga ram danga dan lova hna thawka kalte an ni. 

Hemi a nih avang hian Mizo Diaspora Cell chuan Mizoram atanga hnathawk tur emaw, sumdawng turte emaw chuan India dan leh an tlawh tur ram dante tha taka zawm turin a ngen thar leh a ni.

Tun hnaia an thutkhawmnaah Mizo Diaspora Cell chuan tanpui ngaiten awlsam taka thu an thlenna tur te, an thu thlente rang zawka dawnsawn theihna tur te, best practice-te leh ram danga thawk turte tih tur/tih loh tur (Do’s and Don’ts) leh thil tangkai dang inhrilhriat nan social media platform hman uar an rel a. Mizo DiasporaHub-ah hmun hrang hranga Mizo welfare association an inziak lut mek a, he hub hi tangkai taka hman a nih zel theihna turin a tam thei ang ber inziak lut turin an ngen.

Chief Minister Lalduhoma chuan June 21, 2025 khan Aijal Club-ah Mizoram pawn hmun hrang hranga awm Mizote inthlun zawmna tur, Mizo DiasporaHub hi a lo hawng tawh a. Ram hrang hranga Mizo awmte chu an awmna ram dante zawm tur leh Mizo ram leh hnam timawitu nih tum turin a chah.

Mizo DiasporaHub hi Mizo Diaspora Cell leh LushAITech tangdunin an siam a ni a, hmun hrang hranga cheng Mizote inthlun khawmna tur internet portal a ni a. Portal hi Playstore leh Appsstore-ah lak (download) theih a ni a, website mizoram.diasporahub.in atanga luh theih a ni bawk.