ZALEN, Sept. 27, 2028: Serchhip nula, Lalrempuii chu Mizo hmeichhe zinga senior level badminton inelna (national ranking tournament level)-a semi final lut thei hmasa ber leh medal vaw chhuak thei hmasa ber a ni ta a, Pathianni khan Lucknow-a inelnaah mixed doubles-ah bronze medal a vaw chhuak.

Thawhtanni atanga Uttar Pradesh khawpuia Yonex-Sunrise Dr Akhilesh Das Gupta Memorial All India Senior Ranking Badminton Tournament 2026 khelh mekah Rempuii hi Vansh Dev, Delhi nen inkawpin qualifying round atanga tanin semifinal an invaw thleng a ni.

Semifinal-ah hian anmahni ang bawka qualifying round atanga bul tan, Bhavya Chhabra & Aditi Bhatt te thian dun nen inhmachhawnin game hmasa ber hloh mah se game hnihnaah an insiam tha a, deciding game-ah pawh dinhmun tha zawka ding zauh zauh chungin 8-15, 15-13, 13-15-in an tlawm ta hlauh va, pathumna dinhmun an luah ta a ni.

Semifinal lut tura an kalkawngah hian qualifying round-ah vawi thum an chak phawt hnuah main draw an lut chauh va. Main draw-a an khelh hmasa ber, round of 32-ah Seeded No. 2 Aman Farogh Sanjay & Sonali Mirkhelkar te inkawp an vawi thla thei nghal a ni.

Round of 16-ah Soham Phatak & Siya Singh te tang dun lakah game khatna hloh mah se 11-15, 15-12, 15-9-in an lehthal a, quarter final-ah Seeded No 7 Aaryan Sapiah & Pranavi Natarajan te lakah 15-12, 15-13-in an chak a ni. 

Rempuii hi Tata Trusts, NEIDA, Pullela Gopichand Badminton Academy (PGBA), Mizoram State Sports Council (MSSC) leh Mizoram Badminton Association (MBA) te thawhhona, Mizoram Badminton Initiative hnuaia zir niin Regional Development Centre, Serchhipah bul a tan a. PGBA, Hyderabad, Telengana-ah insawnin, tunah hian National Centre of Excellence, Guwahati-ah hun pum a training neiin a awm mek a ni.

MBA 2024-25 Player of the Season atana thlan lo ni tawh, Rempuii hi kumin kumtir khan MSSC-in Most Promising Sports Women of the Year-ah a thlan a ni bawk.

MBA chuan Rempuii leh a kawppui a lawmpui a, Mizoram tihmingthaa sport hmanga Mizo hmeichhiate dinhmun chawisangtu ni zel tur leh hlawhtlinna sang zawk nei zel thei turin duhsakna a hlan.