ZALEN, October 28, 2025: LESDE Mizo Idol Season 8 Top 7 intihsiakna result puan niin Top 5-ah mi pasarih an tling a, intihsiakna an chhunzawm leh nghal. 

Inrinni zan khan Mizo Idol Top 7 intihsiakna result hi R.Dengthuama Hall, Mualpui, Aizawlah puan a ni a. Vanlalneihpuii, Emanuel Lalremruata, Lalthakima, Sylvia Malsawmpuii leh Remlalvuani te Top 5-ah an tling.

Anni panga bakah hian intihsiakna buatsaihtu, Zonet social media hrang hranga entu ngah ber, Zomuansanga chu a thiam panga zingah puan zui a ni.

Dawrpui Vengthar, Aizawl tlangval hian Zonet Instagram, Facebook leh YouTube-ah Top 7 intihsiak zawh atanga Thawhlehni tlai dar 03:00 thleng khan entu maktaduai 3.3 zet a nei tling a ni.

Zomuana bakah hian judge-te zinga mi, Hmingtea Chhangte chuan chhan theihna a neih hmangin Dinsanga chu a chhan veleh bawk.

Top 5 intihsiak hi Thawhlehni zan bakah Ningani zanah neih tur a ni a, Zirtawpni zanah result puan tur a ni ang.