ZALEN, October 30, 2025: LESDE Mizo Idol Season 8 kal mekah Ningani zanah a zan hnih nan Top 5 intihsiak a ni dawn a, he round atang hi chuan a hma social media entu ngah berin a dawt leh round an luh mai theihna, ‘Viewer WILDCARD’ chu tihtawp a ni tawh dawn.

Tar lan tawh thin angin intihsiaknaah hian Top 20 atang khan a buatsaihtu, Zonet social media hrang hrang - Facebook, YouTube leh Instagram-a an zai an dah entu ngah ber chu round sang zawkah hlangkai nghal zel an ni a, hei hi Top 7 intihsiakna thleng an kalpui.

Entu ngah nih erawh a la pawimawh reng dawn a. Top 5 intihsiakna atang hian judge pakhat anga kalpui a ni tawh dawn a, mark 100-ah 25 a chang ve dawn tihna a ni.

Viewer WILDCARD hi chhawrtu pawh pathum an awm tawh a. Top 20-ah khan Emmanuel Lalremruata chu entu ngah ber niin Top 10 a lut nghal a. A dawt round hnihah Lalthakima leh Zomuansanga te pawhin zai tha vak lo ni chungin round sang zawk an luh phah tawh bawk.

Mizo Idol Top 5-ah hian mi pasarih la awmin Thawhlehni zan khan sound track hmangin an intihsiak tawh a, Ningani zanah live music hmangin an chhunzawm dawn a. R. Dengthuama Hall, Mualpui, Aizawla chhim theih a nih bakah Zonet Zawlbuk-ah leh Zonet YouTube-a member leh OTT atangin Zonet Empai-ah en theih a ni leh ang.