ZALEN, August 6, 2025: LPS Vision Production buatsaih, Mahindra XUV 3-XO Mizo Talent chu Thawhlehni zan khan tan a ni ta a, thiam thil danglam tak tak hmuh tur a awm nghal a, a zan hnihna atangin mipui tan a thlawna chhim theih a ni tawh dawn bawk.

LPS Arena, Falkland, Aizawla show kalpui tanah hian a zan khatnaah pawh thiam thil hrang hrang, danglam leh hmuhnawm, ngaihven hlawh tak tak a tam nghal hle.

Heng zingah hian Nalzawl khaw rawlthar mitdel, kum 17 mi, Lalrinawma phenglawng tum chuan thlirtute rilru a hneh zual hle a, a tum thiam em avangin ngaihven pawh a hlawh nghal hle.

Rinawma bakah hian tlangval pahnih, TG Reeds tia hming invuahten saxophone an tum chu Mizo tum ni awm lo khawpa mawi a ni a. Team Unknown tia hming invuah, nula leh tlangval rual inkawp pakuaten lâmin mit a titlai hle bawk.

Intihsiakna hi Mapuia (FTH), Victor-a, Rosie leh Nutei Pautu ten an endik a, first round zan khatnaah an che dan, an comment leh sawi zauna a ngaihnawm a. Comedian Mapuia’n contestant-te a chhaih kual leh judge dangte chetla chu show tihmuhnawm zualtu a ni bawk.

Mahindra XUV 3-XO Mizo Talent first round intihsiakna hi TV atanga en duh tan LPS 1-ah live-a pek chhuah niin LPS YouTube Channel-ah live a ni bawk.

A zan khatnaah TV leh YouTube-a entuten an hlut em avangin a hmunah mipui chhim theih turin LPS Mizo Talent Organising Committee chuan ruahmanna a siam thar a, Nilaini zan dar 08:00-ah tan leh a ni dawn a, sum sen ngai lovin a en theih dawn a ni.

Mizo Talent-ah hian zai leh lâm bakah instrumental music, magic show leh acrobatic hmangin an theihna an lantir dawn a. Pakhatnain Rs. 2,00,000 a dawng ang a, Top 3-a lang mi dang pahnihin Rs. 50,000 ve ve dawngin Top 10-a lang mi dang pasarihten Rs. 10,000 theuh an dawng bawk ang.