ZALEN, June 11, 2025: Zai mi, lâm thiam, rimawi tum thiam, magician leh acrobatic lama tuite tana tel theihna tur, ‘Mizo Talent’ intihsiakna tan hun chu remchan zawkna avangin August 5-ah sawn a ni a, Rs. 2,00,000 dawn theihna tur show-a inlan tumin mi thahnem takin entry form an theh lut tawh.

LPS Vision Production buatsaih, Mizo Talent intihsiakna chu ruahmanna hmasaah July 24-a tan tur angin puan ni tawh mah se neihna hmun tur, LPS Arena lam remchanna avangin tan hun tur hi sawn a ni.

Mizo Talent-ah hian zai mite tan a tel theih a, mal zai emaw, zaipawl emaw a huho (group/band) ang pawhin a tel theih a. Lâmah pawh mi mala tel duh tan kawng a inhawn rualin a huhoa lâm duh tan pawh intihsiak a hmachhawn theih a ni.

Rimawi hmanraw chi hrang hrang tum thiamte tan a tel theih a, heng bakah hian category dang, magic leh acrobatic pawh a awm bawk.

Mizo Talent-a pakhatnain Rs. 2,00,000 a dawng ang a, Top 3 zinga mi pahnihin Rs. 50,000 ve ve an dawng ang a, Top 10-a inhlang kai, Top 3 ni pha ta lo mi 10-te pawhin Rs. 10,000 theuh an hlawh dawn a ni.

Mizorama TV reality show hlawhtling tak taka lo buatsaih tawh thin, LPS-in talent hrang hrang neite inpho chhuahna tur a buatsaih tur hian ngaihhlut a hlawh leh viau tura ngaih a ni.