ZALEN, October 23, 2025: Mizo volleyball player hriat hlawh ber zinga mi ni mek leh league sang ber, Pro Volleyball League-a champion nomawi lo la tawh, Lalnunfela chu Ningani khan a thi a, an khua, Kawrthahah vui a ni.

Nunfela hi Mizorama volleyball league sang berah hian Anastasia Electric Veng Volleyball Club-a khel mek niin season hmasa khan Hunthar Volleyball Club chu a champion-pui nghe nghe.

Tun season-ah hian Pro Volleyball League-a kum 2018-a bul a tanna, Electric Veng club-ah insawn lehin season hawnna, Mizoram State Sports Council (MSSC) Golden Jubilee Celebration Mizoram Volleyball Association (MVA) Season Opening Tournament-ah a champion-pui lehnghal bawk a ni.

Club tan bakah Mizo middle blocker tha ber pawl ni mek, Nunfela hian Mizoram tan pawh 2024 North East Olumpic Games, Nagaland-a khelhah khan gold medal hlawh chhuaktu team-ah a lo tel tawh bawk.

Kum 26 mi, Nunfela hi Nilaini zana an team an practice zo a haw chu a chauh deuh thu a sawi a, engmah insawisel zuina pawh a nei chuang lo va. Zarkawta a awmna, a nite ina zana a phone hmang chu a tlu a, Civil Hospital, Aizawl panpui nghal ni mah se an chhan thei ta lo va, Ningani tuk dar 12:15 velah a thi a ni.

A ruang hi zingah an khua panpui a ni a, Rev. Sapchhawna Ralte-in an chenna inah a vui a ni.

Nunfela hi a khelh tawhna club - Tuichangral Volleyball Club, Chhinga Veng Spikers leh Hunthar te chuan an ui thu leh an sun thu an sawi hlawm a. MVA pawhin ‘discipline tha leh fel, hotute thuawih thin mi’ tia sawiin ‘hun lo taka chatuan ram min pansan hi MVA chuan a hrethiam lovin a ui tak zet’ tih an sawi.