ZALEN, June 22, 2025: Kum 19 pawh la tling lo mah se Durtlang rawlthar, C. Lalramsanga chuan Mizoram tan chanchin chhinchhiah tlak ziakin India ram pum huap senior ranking badminton tournament-ah lawmman pahnihna a dawng a. Mizo shuttler zinga hetiang hlen thei hmasa ber a ni.

Pune, Maharashtra-a Inrinni kal ta atanga Yonex-Sunrise V.V. Natu All India Senior Ranking Badminton Tournament 2025 khelh tanah Ramsanga hian a kawppui, Aanya Bisht nen mixed doubles-ah qualifying round atanga bul tanin final an invaw thleng.

Pathiannia inelna zawh takah hian mixed doubles-ah hian pair 208 inlanin heng zinga pair 192-in qualifying an khel a. Ramsanga leh Uttarakhand tleirawl hian qualifying round-a inkhel pathum an hmachhawna an chak vek hnuah main draw lutin round of 32 atangin bul an tan a ni.

Main draw-ah hian a hmasa berah Seeded No. 2 Ashith Surya leh Amrutha P. te hmachhawnin awlsam takin 21-15, 21-7-in an chak a. Pre-quarter final-ah Dharmagna Mandapati leh Prerana Neeluri te inkawp pawh straight set bawkin 21-14, 21-17-a hneh lehin quarterfinal an lut.

Semifinal luh inchuhnaah Seeded No. 6 Nitin Kumar leh Ritika Thaker tangdun hmachhawnin game hmasa ber hloh mah se 16-21, 21-14, 21-15-in an lehthal a. Semi final-ah Nithin H.V leh Srinidhi N. te te inkawp lakah game hmasa ber hloh leh mah se 16-21, 21-12, 21-19-in an hneh a, final an lut.

Final-ah hian Seeded No. 1 leh tawnhriat nei tha, Sathwik Reddy K. leh Radhika Sharma te hmachhawnin game hmasa ber la mah se game hnihna atangin tawnhriat nei tlem an nihna a lang a, a tawpah 17-21, 21-10, 21-17-in a chak lo zawkah tangin pahnihna an ni.

Ramsanga hi TATA Trusts, NEIDA, PGBA, MSSC leh MBA te thawhhonna hnuai atanga badminton zinkawng zawh tan a ni a. Pullela Gopichand Badminton Academy (PGBA), Hyderabad, Telengana-a hun eng emaw chen a awm hnuah National Centre of Excellence, Guwahati, Assam-ah a insawn a, tun thleng hian a la awm.

Mizoram Badminton Association (MBA) chuan under-19 player ni chunga senior level-a final thleng thei Mizo player an nei theih leh India rama badminton inelna sanzia ngaihtuaha hetiang dinhmun thleng thei an nei chu ropui an tih thu leh Mizoramin badminton-a hma a sawnzia tilangtu a nih thu an sawi.

“Mizoram tihmingthaa badminton-a Mizoram pho chhuaktu, Ramsanga hi kan chhuang tak zet,” tiin hlawhtlinna sang zawk chang chho tur leh Mizoram bakah India ram tihmingthatu ni chho zel turin duhsakna an hlan.