ZALEN March 5, 2026 : Staff Selection Commission (SSC) hnuaia Border Security Force (BSF) hnalakah 2024 khan hnamdang mi pariat te chu Mizoram mi anga Residential Certificate lem siamchawp hmangin lak an nih thu MSU chuan an sawi.

He exam ah hian Mizoram hian quota mi 10 a nei a, hetah hian Mizoram mi ni lo pariat te hi an tel a, Heng mi pariat te hian DC Aizawl leh DC Mamit atanga lakchhuah ni awm tak Residential Certificate an nei vek a ni.

Heng Residential Certificate te hi Ministry of Home Affairs, Subsidiary Training Cente, Border Security Force, Indore verification ti turin Aizawl DC leh Mamit DC te chu July ni 19, 2025 khan a rawn hriattir a. He verification ti tura an hriattirna leh DC ten an chhanletna hi RTI hmangin MSU chuan an dil chhuak a, he thil thleng hi hriat chhuah a ni ta a ni.

Heng mi te hi khawi state mi nge an nih an hriat theih rih loh thu MSU chuan an sawi a, hetianga certificate lem chiang tak hmanga Mizoram quota an lo luah ringawt hi pawi an ti a, DC pahnih ten Certificate lem a ni tih an hriattir chunga an training leh an service an chhunzawm thei tho chu mak an tih thu an sawi bawk.

Heng mi pariat zinga panga te hian Mualveng, Tlangnuam, Aizawl a cheng angin RC an nei a, pahnih hian Chilui, Mamit district RC an nei a, pakhat hi a RC ang chuan Phaizau, Mamit District mi leh sa ang a ni.

Hemi te rual Mizo tling chu Lalremmawia s/o Thangliana, Hunthar Veng, Aizawl leh Fredy Lalhruaitluanga s/o Laldika, Republic Vengthlang, Aizawl te an ni.