ZALEN May 6, 2026: Mizoram Police chuan kum 2026–2027 “Year of Discipline” atana a puan hawnna inkhawm chu vawiin chawhma khan G.S. Arya Mess, Police Headquarters, Khatla, Aizawl-ah Home Minister K Sapdanga’n a hmanpui.

K Sapdanga chuan Discipline chu Police-te tan chuan an neih makmawh a nih thu a sawi a. Mizoram ralmuanna chu ngaia nei a, inthlahdah mai lo tur leh, remna a awm zel theih nana tan lak zel a tul thu a sawi. Police-te chu an tawngkamah te, an cheziaah te, leh an nungchangah te inthunun tha turin a fuih a. Mipuite rinngama Police-te an awm phawt chuan mipuite pawhin dan zawm an ngaih pawimawh ngei a rin thu a sawi.

He hmalakna atana inkaihhruaina leh hmachhawp pawimawh tak tak awmna lehkhabu, “Mizoram Police Model Guidelines for Year of Discipline 2026–2027 (Core Principles and Specific Areas of Focus)” chu Khuallian hian a tlangzarh nghal a ni.

Mizoram DGP Sharad Agarwal a pawhin thu sawiin, Discipline chu Police Service zung pawimawh a ni a ti a. Rinawmna leh inpekna nena hna thawk theuh turin Police-te chu a fuih a ni.

'Year of Discipline' lungphum leh thlur bik turte (Core Principles and Specific Areas of Focus) chu:

- Hun vawn dik, mahni hnaa rinawm, leh thahnemngai taka mawhphurhna hlen chhuah.

- Hnathawh dan kalphung inkaihhruaina vawn dik, document vawn dik, dan zawm that, leh thubuai chhui (investigation) a hun taka tihfel.

- Hna chungchanga nungchang mawi vawn, mipui nena indawrnaah inthliar hranna awm lova rualkhai taka chet, mi harsa leh chak lo zawkte hriatthiamna neih.

- “Train to Excel” programme hnuaia taksa hriselna leh engtik lai pawha che chhuak thei tura inbuatsaih.

- Turnout fel tak nena parade, drill leh endikna (inspection) neih thin.

- Police hmunhma hrang hrang (establishment) te fai taka vawn leh enkawl.

- Sorkar bungruate uluk taka enkawl leh chumi chungchanga mawhphurhna lak.

- Rinawm, dik leh lang tlang taka hna thawh leh

- Hotuten an hnuaia mite hnathawh vil that te an ni.

He hunah hian IGP, DIG, AIG, SP leh Commandant zawng zawng, Principal, Police Training School leh Aizawl-a Police officer hrang hrangte bakah, Home Department-a official lian leh sawm bik mi thahnem tak an tel a. AIGP (Headquarters) David H Thangliana'n lawmthu sawiin hun a khar a ni.