ZALEN June 18, 2026: Mizoram-a rorel lai Zoram Peoples Movement candidate K. Laltluangkima chu Mizoram-a Rajya Sabha seat awmchhun atan thlantlin a ni a, ZPM thupuangtu hian vote tla 36 atanga 26 chu a hmu a, amah khingtu awmchhun Mizo National Front candidate Zothansangi chu a hneh a ni.

Mizoram Rajya Sabha atana thlan tlin tak K. Laltluangkima chuan Mizoram sawrkar nena thawkdun tur an ni tih a sawi a, Mizoram sawrkarin hmachhawp tha tak tak a neih ti puitlin turin central lamah theihtawp a chhuah dawn a ti a, Parliament lamah chuan Lok Sabha MP Richard Vanlalhmangaiha ang bawkin a subject a zira a din tur thu a sawi.

ZPM candidate polling agent KJ Lalbiakngheta chuan K Laltluangkima hian vote tla 36 atangin vote 26 a hmu tih hi a sawi. "Vote 40 awmah BJP MLA pahnih leh Congress MLA pakhat chu tun inthlanah hian an hai a, kan MLA pakhat W Chhuanawma chu damlohna avangin a inlan thei lo a, state election official hnenah home voting kan dil a, mahse, min phalsak lo a ni," KJ Lalbiakngheta chuan a ti. 

ZPM chuan Rajya Sabha MP atana K. Laltluangkima thlan tlin a nih nana an party MLA vote thlak thei ten ZPM 'official candidate' an vote vek thei chu party inlungrualna leh thawhhona thatzia lantirtu a ni an ti.

Kum 2026 atanga 2032 thlenga Mizoram aiawha Rajya Sabha Member of Parliament ni tur K. Laltluangkima hi ram leh hnam tana theih tawp chhuah turin duhsakna an hlan bawk a ni.

ZPM chuan BJP MLA pahnih leh Congress MLA pakhatin vote an thlak duh lo hi mipui zah lohna leh India dan zah lohna lantirna dik tak a ni. Mipui hnêna vote zawng thin, vote thlak uar tura fuih tur te, khua leh tui tha ni tura vote thlak pawimawhna te auchhuahpuitu tur berin vote an thlak duh lo hi 'khua leh tui tha' mawhphurhna hlen duh lo mizia dik tak a ni, an ti.