ZALEN November 12, 2025: Mizoram sawrkar chuan Nidhi Creative Infrastructure Pvt. Ltd. chu an duhsak bik niin tun hnaiah thu a thang nasa a. Contract hna tam tak a pe angin social media ah mi thenkhatin an tarlang a, hei hi PWD chuan sawi fiahin, thu dik tawk lo a ni an ti.

PWD chuan thuchhuah siamin, sawrkar hmasa hun chhung (2019-2023) khan Nidhi Creative Infrastructure Pvt. Ltd. hian hna cheng vaibelchhe za sawmsarih panga leh nuai sawmkua pakua (Rs. 175.99 crore) man an lo thawk tawh niin an tarlang a. Tun sawrkar hnuaiah hian cheng vaibelchhe sawmthum pakhat leh nuai sawmnga pakhat (Rs. 31.51 crore) man an thawk leh tawh niin an tarlang bawk a. Heng hnate hi Mizoram sawrkar pek an ni lo a, Ministry of Road Transport and Highways in e-tender hmanga a pek te vek an ni tiin, Mizoram sawrkarin mawhphurhna a nei lo tiin an tarlang.

Tun Ministry hnuaiah hian Nidhi Creative Infrastructure Pvt. Ltd. te hi Aizawl khawpui chhung kawng resurfacing hna leh State Emergency Operation Centre hna, a vaiin cheng vaibelchhe sawmnga pasarih leh nuai sawmkua pasarih (Rs. 57.97 crore). man pek an ni tiin PWD thuchhuahah chuan an tarlang a. Heng hnate hi hna hmanhmawhthlak, contractor nazawng thawh theih loh leh machinery hranpa ngai a nih avanga pek an ni an ti bawk.

An thuchhuahah hian PWD chuan hnathawh tha lo report kan dawn te reng reng hi um zui nghal zel a ni an ti a. Hna thawh mek, la thawh zawh loh te a thla te laa hna thawh zawh tawh anga media-a tarlan a ni thin erawh hi chu a pawi hle an ti a. Thu belh chian dawlte erawh chu um zui nghal zel turin PWD hi a inpeih reng an ti.

Kawng tha leh tlo zawk nei turin PWD chuan theihtawp a chhuah mek reng a, mipuite thurawn dawng tur pawhin a inhawng reng a ni an ti bawk.