ZALEN July 02, 2026 : Vawiin khan Social Welfare, Women & Child Development Department leh Toyota Kirloskar Motor (TKM) te chuan Mizorama mitdelte zirna leh khawsak tihhmasawnna tur thawhdunna thuthlung (MoU) SAD Conference Hall, MINECO-ah an ziak. MoU hi sawrkar aiawhin Commissioner & Secretary Lalzarmawii leh Toyota aiawhin Vice President Ramesh Rao ten an ziak a ni.

Minister Lalrinpuii chuan Bhubaneswar-a CSR Conclave 2025 an neih aṭanga he thawhdunna hi lo inṭan a nih thu sawiin, Mizorama khaw hmu lo mi 2,035 awm zinga zaa pakhat chauhvin eizawnna mumal an nei chu puih an ngaih thu sawiin, hmasawnna huapzo hnuaiah mimal tinin zirna tha an dawn theih nan te, mahni intodelha khawtlang hnena pek let an neih theih nante Mizoram sawrkar leh Toyota Kirloskar Motor thawh dunna chu rahbi pawimawhtak a nih ngei a beisei tlat tih a sawi 

Toyota Kirloskar Motor, Corporate Affairs-a Country Head & Executive Vice President Vikram Gulati chuan mihring chet velna tihawlsam chu mihring theihna paw chhuak tura pawimawh hmasa ber pakhat a ni a, Tunlai thiamna hmanga mihringte'n mahni inrin tawkna nena hna an thawh chuan nghawng thui tak a neih thu a sawi.

He thawhdunna hnuaiah hian a thawh khatna atan Special Blind School, Durtlang hnenah khaw hmu lo te mamawh hmanrua—Navinaut Assistive Mobile Device 250, Braille computer, printer leh AI scanner pek an ni dawn a. A thawh hnihnaah Navinaut Device 930 sem belh leh tura ruahman a ni. He hunah hian Department hotu pawimawh te leh Zote Toyota hotute an tel a ni.