ZALEN July 29, 2026: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Mizoram State Human Rights Commission (SHRC) hmasa ber Chairperson atan Justice Marli Vankung, Former Judge, Gauhati High Court leh Member atan Vanlalenmawia, MJS (Rtd.) leh K. Lal Nghinglova, IAS (Rtd.) te chu Durbar Hall, Lok Bhavan, Aizawlah rinawmna thu tiam tirin a la lut. 

Lakluhna inkhawmah hian Chief Secretary Khilli Ram Meena chuan Larsap-in Mizoram State Human Rights Commission Chairperson leh Member-te a ruatna notification a chhiar chhuak hmasa a. Hemi hnu hian Larsap General (Dr) Vijay Kumar Singh chuan Justice Marli Vankung, Vanlalenmawia leh K. Lal Nghinglova te chu rinawmna thutiam chham tirin a lalut a ni.

Mizoram State Human Rights Commission hmasa ber Chairperson leh Member-te lakluhna inkhawmah hian Chief Minister Lalduhoma, Speaker Lalbiakzama, PWD Minister Vanlalhlana, EF&CC Minister Lalthansanga, Opposition Leader Lalchhandama Ralte, P&E Minister F. Rodingliana, IPRP&S Minister B. Lalchhanzova leh sawm bik mi pawimawh dangte an tel a ni. 

Justice Marli Vankung March ni 4, 1964 ah piangin thiamna lamah B.A. (English Hons.), LL.B. leh M. Phil (International Legal Studies) nei niin, kum 1989 khan Mizoram Judicial Service (MJS) a zawm a. Mizoram sawkarah post pawimawh tak takte a chelh hnuin October ni 13, 2021 khan Additional Judge, Gauhati High Court-ah hlankai niin, August ni 1, 2023 khan permanent judge atan ruat a ni a. March ni 3, 2026 khan superannuation pension-in a chhuak a. Tunah hian Republic Veng, Aizawlah a pasal fanaute nen an cheng mek a ni.

Vanlalenmawia hi April ni 1, 1966 ah piangin thiamna lamah B.A., LLB degree nei a ni a. Kum 2011 khan Mizoram Judicial Service (MJS) zawmin Mizoram sawkarah post pawimawh tak tak a chelh hnuin March ni 31, 2026 khan Presiding Officer, Motor Accident Claims Tribunal, Aizawl, post a chelh laiin superannuation pension-in a chhuak a. Tunah hian a nupui fanaute nen Tuithiang, Aizawlah an cheng mek a ni. 

K. Lal Nghinglova hi December ni 1, 1956 ah piangin thiamna lamah BA (Hons) a ni a. Kum 1983 khan District Information & Public Relations Officer hna zawmin Mizoram sawkar hnuaiah hna pawimawh tak tak a thawk a. Hemi hnu hian Indian Administrative Service (IAS) zawmin AGMUT Cadre 1996 pek a ni a. Mizoram leh Delhi sawkar hnuaia post pawimawh tak tak a chelh hnuin Principal Secretary to the Government of Mizoram niin November ni 30, 2016 khan superannuation pension-in a chhuak a. Tunah hian a nupui fanaute nen Ainawn veng, Aizawlah an cheng mek a ni.