ZALEN February 28, 2026: Chhimbial Chhantu chuan, Mizoram Legislative Assembly pakuana thutkhawm vawi 6 na neih mekah, Ni 25.2.2026-a ‘The Mizoram State University Amendment Bill 2026’ pass a ni ta chu lawmawm an ti a, he bill pass a nih theihnana chak taka hma la tu - Mizoram State University Demand Committee Lunglei leh Lunglei MLA palite bakah Chief Minister leh Higher & Technical Education Minister, Dr Vanlalthlana te chungah Chhimbial Chhantu chuan lawmthu a sawi a ni.

Chhimbial Chhantu chuan he bill pu lut tu, Dr. Vanlalthlana’n State University in a huam tel tur (Cluster of Colleges) zingah Mizoram Engineering College leh Lunglei Government College te an tel dawn thu a sawi chu lawmawm a tih rualin, zirna In dang - Govt’ J.Buana College leh DIET Lunglei te an la tel ve loh avangin, a rang thei ang bera cluster of colleges zinga telh an nih theih nan Mizoram sawrkar a ngen bawk.

Budget Session neih mekah “Mizoram State University Headquarters Aizawla awm tur a Mizoram Assembly-in a pass tawh hi kaltlangpui nise, hemi rual hian Chhim bial mipuite duhdan leh beisei ang ngeiin State University dang, Lungleia Headquarters awm tur din ni bawk rawh se” tih MNF MLA ten Private Member Resolutions an thehlut vek mai chu Chhimbial Chhantu chuan mak a tiin pawi a ti a. State University pahnih din chu State pachhia, Mizoram tan thil theih a ni lo tih, tute pawhin an hriat chian em em laia MNF MLA ten State University pahnih din an rawt chu chhimbial mipuite an duhsak loh zia lan chianna leh Lungleia State University din tur sawihnawmnaah a ngai tlat a ni.

Chhimbial Chhantu chuan Lungleia State University din tur chu Lunglei leh Chhim lam mipuite ta bik chauh ni lovin, Mizoram pumpui ta tur a ni tih zoram mipuiten hrethiam se a duh a, Mizoram zimteah hmasawnna rualkhai awm se, hmasawnna ruhrel leh thil dangte pawh, hmun khata dahkhawm zel lo in semzai ni thin se tih chu Chhimbial Chhantu duhdan a ni.