ZALEN, August 25, 2025: Mizorama a khelhna dawhkan la awm lo mah se Lalrina Renthlei chuan 1st NSCI Heyball National Championship 2025-ah hnuhma tha tak hnutchhiahin a thiam pariat zingah a inhlang kai.

Lalrina hian Thawhtanni tlai khan quarterfinal-ah Sundeep Gulati, Delhi hmachhawnin 9-6-in a tlawm zawkah a tang a, ani hi Mizo player tel pasarih zinga a dam awm chhun a ni tawh.

Tuikhuahtlang, Aizawl tlangval bakah hian R Lalthazuala chu round of 64 a inhlang kai a, ani hi Lalrina dawta thleng sang ber a ni a. Round of 32 luh inchuhnaah Thawhtanni chawhma khan a chak lo zawkah a tang a ni.

Lalrina hian quarterfinal inhlang kai turin a kalkawngah Indian player tha, Praveen Mane, Karnataka chu 9-8-in a hneh a, a hma chiaha a khelhah Laxman Rawat, Petroleum Sports Promotion Board (PSPB) laka 2-6-a a hnufual hnuah 9-6-in a lehthal bawk.

Dawhkana ball hawlh hmanga inelna zinga mi, Heyball an tih khelhna dawhkan hi Mizorama la awm lo a ni a, pool khelhna nen intiat deuh reng mah se a kua a zim zawk a, a ball pawh pool-a a laia hawlh tlang (diameter) mm 52.5 ni chu mm 57 daiha a ni bawk.

A dawhkan a la awm loh avangin Mizo player-te tan inbuatsaih lawk tak tak theih a ni lo va, heti chunga a vawi khat nana ram pum huap intihsiaka an telnaa Mizo player-te thlen chin hi a hniam lo hle nia ngaih a ni a. Heyball Pool khelhna tur table-ah rual an awt hle niin a hmuna awmte chuan an sawi.

1st National Sports Club of India (NSCI) Heyball National Championship 2025 hi August 17 atanga khelh tan kha niin Thawhlehnia zawh tur a ni a, Delhi-a Major Dhyan Chand National Stadium-ah khelh a ni.

Mizoram Snooker & Billiards Association (MSBA) aiawh player pasarih kalte hi Lalrina leh Thazuala, Chaltlang, Aizawl bakah Lalbiaksanga, Mission Vengthlang; T Laltanpuia, Upper Republic; PB Liansangzuala, Dawrpui; Lalchhandama, Dinthar; leh Henry L Hlawnmual, Chanmari West (Delhi-a awm mek) te an ni a. MSBA official pahnih, Senior Vice President Vanlalnghaka leh Media incharge H Lalthuthlunga Zate te an kal bawk.

Championship tan hma ni, August 16 tlai khan Billiards & Snooker Federation of India (BSFI) Office Bearers an thu a, BSFI vice president, MSBA senior vice president ni bawk, Vanlalnghaka a tel a. August 17 khan BSFI Executive Meeting an thu leh a, hetah hian Vanlalnghaka bakah MSBA aiawhin President Lalbiaksanga a tel bawk.