ZALEN, Aug. 14, 2026: India chhul chhuak Sport Utility Vehicle (SUV) hmasa ber, Mahindra Scorpio-in kum 24 tling tawh mah se mipui duh a la ni reng a, Zirtawpni chawhnu khan Mizorama hralh chhuah turin Scorpio N chhuak thar an tlangzarh.

Mana Motors showroom, Bawngkawn, Aizawlah CID changtu, Deputy Inspector General of Police Lalzahngoa’n tlangzarh inkhawm a hmanpui a, miten an hmuh dan leh an duh dan atangin Scorpio chu lirthei tha tak a ni a, Scorpio N chhuak thar leituten tangkaia an hman ngei theih nan duhsakna hlanin Mana Motors neitu, Dr Franklin Lalrinngheta te chhungkuain an khuh hawng.

June, 2002 khan Scorpio an tlangzarh a, Indian automobile company-in SUV an tihchhuah hmasak ber a nih rualin Mahindra hmingchherna lian tak a ni a, vawi eng emaw zat tuai thar tawhin kum 20 a tlin hnu, June 27, 2022 khan changkang leh huap zo leh zual turin Scorpio N a tichhuak a, hemi rual hian Scorpio Classic a kalpui zui zel tho.

Thla liam ta thleng khan Mahindra-in Scorpio chi hrang hrang nuai 13.5 chuang a hralh tawh a, July, 2026-ah 16,000 chuang hralhin lirthei a siam chhuah zinga a hralh hnem ber a la ni reng.

India-a lirthei hralh chhuah chhinchhiahna, Vahan-ah thla hmasa khan Mana Motors-in 237 ziak lutin, Mizorama lirthei ke li nei zuar zinga ziak lut tam ber an ni.

Dealer principal Dr Marina chuan Mahindra-in hma a sawn nasa a, chumi rual chuan Mizoram dealer pawhin hma lam an pan ve zel tih sawiin, Scorpio leh Mahindra-in inzawmna thuk tak a nei a, lirthei zahpuiawm loh tak a ni tih a sawi.

Scorpio N chhuak thar hi a hmaa mi nen a pianhmang leh a hmel lan dan inang mah se changkang leh tha zawkin a chhung lam chei a nih bakah kawng chhiaah pawh tang thei mang lo tur leh chuan nuam leh him zawk tura thuam that a ni bawk.

Diesel leh petrol engine hmang duhthlan tur awmin gear thlak chawp chi leh automatic a awm bakah a ke hnung pahnihin a nawr kal leh a ke zawng zawngin a nawr kal (four-wheel driver) a awm a. Petrol engine hmang zingah a man tlawm ber Rs 12,66,873-in a lei theih a, a to ber Rs 25,72,249 a ni a. Diesel-ah a tlawm ber Rs 16,18,159 niin a to ber Rs 28,36,487 a ni ve thung.

Info Cars hotupa, Vanlalmuana chuan Scorpio N chhuak thar thatna chi hrang hrang a sawi zingah, “Electronic Brake Locking Differential (BLD) a hmang a, hei vang hian kawng chhia leh diakah pawh tang thei tawh lo tur khawpa thuam thar a ni,” a ti.

SCORPIO N CHHUAK THAR:

Chhuak hmasaa awm lo, a chhung hma lamah inchi 12.3-a hlai touchscreen, wireless Apple CarPlay leh Android Auto a awm bakah driver tan inchi 10.25-a hlai digital display a awm a; driver puitu degree 540 camera system a awm a. Car chungah sunroof hlai panoramic dah a ni a, alloy wheel dual-tone inchi 18-a hlai vuah a ni.