ZALEN July 28, 2026: Online application hmanga taxi leh auto-rickshaw koh theina tura duan, Mizotaxi mobile application hmang turin lirthei 1,260 an inziak lut tawh a. Hetihlai hian application hi Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owner Association (ADAROA) ten high court-a khin tumin hmalakna an kalpui zel.

Transport department thawktute hnen atanga ZALEN thudawn danin Mizotaxi mobile application hmang turin Zirtawpni thleng khan 2 wheeler taxi 889, 4 wheeler taxi 352 leh autorickshaw 19 an inziak lut tawh a, document fel lo vanga hnawl 135 a awm bawk.

Inziak lut an awm mek lai hian ATTA hruaitute chuan ZALEN zawhna chhangin Mizotaxi mobile application chu lirthei a eizawng pawl pathumten an dodal chhunzawm zel tih an sawi a. Thudawn danin, MTA, ATTA leh ADAROA chuan application chu high court-a khin tumin hmalakna an kalpui chhunzawm zel a, tunah hian document pawimawh RTI hmangin an dil mek a, chhanna an hmuh hunah court luh theih tawh an inring.  

Aizawlah hian MizoTaxi app hi July 1, 2026 atang khan hman tan a ni a. A tira dilna hun hawn hun chhung chu tawp tawh mah se July 31, 2026 thleng inziah luh hun hawn belh leh a. Department thawktute chuan inziah luh tum an awm ve reng thu an sawi.

Sawrkar duh dan angin application hi Aizawlah bul tan phawt a ni a, a tahtawlin district dangah pawh kalpui chhoh zel tum a ni.

Mizotaxi hnuaia in-register-te tana registration fee office order lo chhuah tawh chu thuneitute remtihna in motor pakhat ah Rs. 500/- ah siam rem a ni a. He registration fee hi a motor service hun chhung atan a ni ang a, a bak pek leh a ngai tawh lo ang.

State Transport Authority (STA) chuan thuchhuah siamin Mizotaxi-ah hun tiam chhunga mipui mamawh khawp lirthei in-register an awm loh chuan a tul angin Mizotaxi hnuaia tlan tur permit pek belh a nih tur thu a tar lang tawh.

Pawl pathumten Mizotaxi application an hman duh loh chhan zingah rate ennawn hmasak an duh thu te, registration fee awm lo se tih te leh app hmangtu mipuiten chhiah zaa paruk an chawi turte a tel tih an sawi a, sawrkar hnenah pawh an thlen tawh tih an sawi.

Thlalak - AI hmanga siam