ZALEN June 24, 2026 : Online hmanga taxi leh auto-rickshaw koh theihna tura duan MizoTaxi mobile app chu July ni 1 atanga hman tan turin inbuatsaihna kalpui mek a ni a, MizoTaxi mobile app-ah hian lirthei 306 an in register tawh. 

Mizoram State Transport Authority chuan thuchhuah siamin vawiin tlai dar 3:00 thleng khan four wheeler taxi 14, two wheeler taxi 159 leh autorickshaw 4 te chu MizoTaxi mobile app-ah hian in register an awm tawh a, in-register duhte tan remchan zawkna a nih beiseiin June thla chhunga holiday leh Inrinni-ah pawh Mizotaxi Office chu hawn a nih tur thu an tarlang.

Aizawl khawpui chhunga service lai two-wheeler taxi, four-wheeler taxi leh auto-rickshaw te chu kumin June chhungin registration tifel vek turin an ngen a. Hun tiam chhunga MizoTaxi a mipui mamawh khawp lirthei inziak lut an awm lo a nih chuan two-wheeler taxi 300, four-wheeler taxi 200 bakah autorickshaw, Aizawl City chhunga domain tinah 10 ṭheuh permit pek chhuah phawt a nih tur thu STA thuchhuah chuan a tarlang.