ZALEN july 09, 2026 : Aizawl Traffic SP C. Vanlalvena chuan vawiin khan thuchhuah a siam a, MizoTaxi App-a in register taxi zawng zawngte chu July 10, 2026 atanga August 10, 2026 thleng enchhinna (trial basis) atan tlanlohni nei lovin nitin tlan phalsak an nih dawn thu a sawi.

Traffic SP chuan he ruahman hi Motor Vehicles Act, 1988 Section 115-in thuneihna min pek ang leh ni 8.7.2026-a Co-ordination Committee on Traffic Management (CCTM) meeting-in a rel ang leh mipuite mamawh phuhruk nan Mizoram State Transport Authority (STA) ruahman leh pawmpuina anga kal a ni tih a tarlang.

He enchhinna hun chhung hian MizoTaxi App-a in register tawh taxi-te chu Taxi tlanlohni danin a huam lovang a, nitin an tlan thei ang. Enchhinna neih chhunga in register tharte pawh Taxi tlan lohni in a huam lovang.

Traffic SP chuan MizoTaxi App-a in register taxi zawng zawngte chu STA-in a pek MizoTaxi App sticker chu an taxi hma leh hnungah tar tur a nih thu pawh a hriattir.

Lirthei dang leh MizoTaxi App-a in register lo Taxi-te chu Aizawl khawpui chhunga lirthei intlanchhawk dan tura Public Notice No.RO/TRF/SP-Noti-7/08/1231 Dt.18.12.2025 lo chhuah tawh angin an tlan chhunzawm vek tur a ni tih Traffic SP thuchhuah chuan a tarlang.