ZALEN February 8, 2026: Central YMA President R.Lalngheta chuan, “Mizo hnam hrang hrang hi unau kan ni a, indo lo ang u,” a ti.

Zirtawpni zan khan Manipur Group YMA-ten Inkhawmpui vawi 41-na tawp zan, Lamka Branch YMA Hall, Hmuia Veng-ah an hmang a. He hunah hian thu sawiin Central YMA President R.Lalngheta chuan, “Mizote hi hnam tlem tê kan ni a, YMA chuan he hnam tlem tê hi pumkhata awm hi kan duh ber a ni. Inpumkhatna tur chuan nang leh kei hi kan pawimawh a, chibing tete-a inla hrang lovin hmun khata awm turin ka sawm duh che u a ni. Mizoah hian hnam hrang hrang kan awm a, i inpumkhat ang u, unau kan ni a, i indo lo ang u,” a ti.

“Mizo hnam peng hrang hrangten kan tawng theuhte humhalh ila, chutihrualin kan inbiakpawhna tawng tlanglawn erawh kan thiam tlan a tul a ni,” a ti bawk.

Central YMA president chuan ruihhlo do chungchangah ti hne hne lova huai taka do turin YMA member-te a sawm bawk.

Manipur Group YMA Inkhawmpui hmanpui tur hian Central YMA President R.Lalngheta leh Prof. Malsawmliana, General Secretary hovin CEC member 20 an kal a, Tuiphal Group YMA te an kal bawk.