ZALEN December 10, 2025: Parliament Winter Session neih mekah Rajya Sabha MP K.Vanlalvena chuan vawiin khan thu sawiin India Constitution hnuaia Income Tax Act section 10(26) in a tarlan angin India ram chhunga Tribal hnam te chu Income Tax awl kan nih thu leh hemi a nih avang hian Mizo mipuite chu India Constitution in chhiah min awl a ni tih Vena chuan house a hrilh a.

Hetiang a nih mek lai hian Mizo mipuite zingah Income Tax Certificate phutna thuchhuah Income Tax Office, Guwahati, Assam atanga hriattirna dawng an awm thin thu a sawi chhuak a. Mizo te hi Income Tax pe ngai lo an nih avang leh tribal an nih avangin Income Tax awl an nihna certificate te, Tribal Certificate te chu Income Tax Official-re hnenah an entir hnuah pawh Income tax official te hian an la tihbuai zui fo thute sawi chhuakin, heihi dan kalh a nih thu leh dan lova Mizo mipuite tih buaina a nih thu a sawi lang bawk a.

Principal Chief Commissioner of Income Tax Office, Guwahati, Assam hnenah hriattirna pe tur leh a tul dan ang a action la turin Rajya Sabha Chairman a ngen nghal bawk a ni.