ZALEN December 19, 2025: MJA General Hqrs. chuan Krismas dawn apianga Charity Fund an thawhkhawm thin, MJA member bakah pawn lam mi ten sum an thawh khawm tlingkhawm chu vawiin khan Civil Hospital Aizawl Poor Fund-ah cheng sing 5 leh Zemabawk-a Cancer Hospital Poor Fund-ah cheng sing 7 an hlan.

Civil Hospital, Aizawl-a Poor Fund-a sum hlanna inkhawmah hian MJA President C. Lalrambuatsaiha chuan, Civil Hospital Aizawl chu Mizoram mipui nawlpui leh khawsak harsa zawkte'n an pan khawm ber a nih thu a sawi a. He damdawi-in pantute zingah mi harsa tak tak an awm thin a, chung mite chu damdawi-in a thawkten damdawi leinate an tumsak thin tih an hriat thu sawiin, chung mi harsate tanpuina atan sum hi hlan a nih thu a sawi. 

Civil Hospital Senior Medical Superintendent Dr. Lalchhuankimi pawhin, MJA nen thawh hona tan tak nei a, an damdawi in an hriatsak thin chu lawmawm a tih thu a sawi a, an sum pek chu damlo harsate tan tangkai taka hman a nih tur thu a sawi. Civil Hospital, Aizawl hotute chuan Civil Hospital chu mipui pan hlawh ber pawl a ni a, Mizoram sawrkar-in Health Care scheme tha tak Mizoram Universal Health Care Scheme duang tawh mah se, inziak lut lo leh hmang phak lo tam tak an awm a, heng mite hi mi inphalten sum an pek khawm hmangin damdawi tul hrang hrang an leikhawm sak thin a, tuna sum an pek pawh hi tangkai taka hman a nih tur thu an sawi.

Zemabawk Cancer Hospital-a tanpuina dawngtu Nursing Superintendent Lalthangpuii Pautu chuan, an damdawi in chu Cancer vei te pan khawm an ni a, Cancer chu inenkawl a hautak a, MUHCS-in a daih loh bakah damlo zingah khawsak harsa tak tak an awm thin avangin mi inphalte sum thawhkhawm hmanga inenkawl ve tawk tawk an awm thin tih a sawi a. MJA-in tanpuina an hlan chu an lawm hle tih sawiin, damlo engemaw zatin tangkai taka an hman tur thu a sawi.