ZALEN August ni 21, 2026: Mizo Hnam Run chhung inkhawm chu vawiin khan neih a ni a, political session-a thusawitu MNF GHQ General Secretary Dr. Vanlaltanpuia, Ex-MLA chuan CM Pu Duhoma'n Law College zirlaite hmaa a thusawi Mizoram Accord tih chu a tak takah chuan Memorandum of Understanding a ni a, MNF leh Union Ministry of Home Affairs-te signed niin, Mizoram aiawh a tling phak lo, party pakhat leh Ministry of Home Affairs te inkar thuthlung chauh a ni a tih leh, ILP tawpna chu Central sawrkar kutah a awm a, a duh chuan a titawp thei tia a sawi khan Legal (Dan leh Hrai) leh political debate a cho chhuah nasat thu leh Mizo hnam pawi nasa taka a sawi thu a sawi.

Dr. Vanlaltanpuia chuan, "Pu Duhoma chuan Article 371/G pawh rinhlelhawmah chhuahin, kan inremna ngaih hlut em em chu nep takah a chhuah bawk hi a pawi takzet a, hnam movement avanga tuar nasa mimal leh chhungkua tan a lungchhiat thlak hle a, MNF chuan kan ngai thu tak hle a ni. Mizo hnam movement kha Mizo zawng zawng ta a ni a, a man kan pek pawh a sang hle. Kan hnam martar-te khan vawiin atan an naktuk an hlan a, Mizo mipui ngenna avanga inremna dawhkan kil chauh kan ni. Independence chu ni rih lo mah ila; Memorandum of settlement kha kan political Genesis anih avangin kan ngaihlu a. Chumi in a ken tel India Constitution a ziahluh thar Article 371(G) chu a ngheh lohna zeldin thubawl leh mipui tiralkhel zawnga kan CM ber a tawng kha hruaitu ropui tawng dan tur a ni lo a, inremna tihlawhtlingtu India sawrkar tan pawh rilru natna tham a tling a, kan CM hian ngaihdam dil ngei rawh se," a ti.

MNF General Secretary chuan CM chu campaign laia ti ve lo tura a intiam nasa taka ti leh si-ah sawiin, "Khaw engah mipui hmuh leh hriat vek turin blanket approval a pe leh si a, inthlan campaign laia a huat bera a sawi restricted tender lah a pe nasa bertu a ni a, hengte hi eng vângin nge tunah insawifiahna tinrêng nen a pek leh si tiin CM ka zawt a ni," a ti.

"CM Pu Duhoma'n Unnati loan ka la ti a, TV interview-ah chiang taka a sawi kha, a hnu lawk Assembly Session-ah Unnati loan ka faten lak an tum hi tunge sawisel thei ti a, a insawi mam chawp leh ta mai khan Mizoram mipui mak tih a hlawh a. Unnati loan hi a la ngei anih chuan a lakna document leh a lak zat mipui hmaah show ngei rawh se. Congress Vice President-in Lengpui ram hralhna atanga cheng vbc 10 emaw thuartham CM-in a dawn thu kha chiang taka a hriat thawi thu a sawi bawk nen, kha khan mipui mak tih a hlawh a. Heti zata sum tam, ram danga scam lian tak tak an sawi zat zet hi Mizorama thil thlengah chuan a inhmeh lo a, CM hian a sawifiah ngei ngei a tul a ni," Dr.Vanlaltanpuia chuan a ti bawk.