ZALEN May 1, 2026 : MNF Party aiawha Corporator Candidate te chuan Pathian hruaina leh awmpuina zarah AMC General Election 2026 inthlanna tluang taka zovin, result pawh tluang taka puan zawh fel a lo ni ta a. Inthlanna tluang taka neih anih theih nana hma latute zawng zawng chungah lawmthu an sawi.

MNF AMC Candidate 2026 te chuan, "Mipuitling leh phochhuah ve tlaka min ngai a, duhsak taka AMC Corporator Candidate atana min chhawpchhuaktu MNF Party Gen. Hqrs. leh Party mi leh sate, kan chhungkhat laina, kan thianthate leh min duhsaktu, phur tak leh thatho taka min lo puibawm a, hun leh tha tam tak min senpuitute chungah thinlung takin lawmthu kan sawi a. Hetihlai hian, in mi duhsakna leh in beisei ang kan phak lo erawh pawi kan tiin hrehawm kan ti a. Engkima kan thatna tura rorel thintu Pathian-in kan hun atan a ruat ve rih lo tih min pawmpui hram turin kan ngen tak meuh che u a ni," an ti.

"Campaign chhung in kan phak tawk theuhin theihtawp kan chhuah ve a, campaign chhungin mi rilru tihnat leh hliam palh kan nei anih chuan ngaihdam kan dil a ni," an ti bawk. 

MNF candidate te chuan a tlingte an lawmpui thu sawiin, "AMC Corporator atana thlan tlin zawng zawngte kan lawmpuiin tak zet a. Mitha tak tak an ni tih kan hria a, kan beisei a sang tak zet a. An hma lakna kawng tinrengah Corporator chhuanawm leh rintlak an nih theuh theih nan duhsakna kan hlan a, tangkaina kan nei anih chuan theihtawpchhuaha puihbawm leh tawiawm zel kan inhuam a ni," an ti.

MNF Party in rampum leh AMC Area-a huam china thuneihna kenga ke a lo pen tawhna-ah ram rotling leh sulhnu chhuanawm tam tak a neih laiin, mipuite duhkhawp loh, sulhnu chhui tlak loh leh hriatreng tlak loh a awm thei ang. Uluk leh zuala zirchiang a, ram mipuite duhthusam leh beisei ang ngeia siamrem ngai, siam dik leh siamthat ngaite rang taka siamthat a nih theih nan, tha thlah lova MNF Party kalzelna turah theihtawpchhuah-a tan lak zel nise tiin lungrual takin kal zel an tum thu an sawi.