ZALEN June 30, 2026 : Mizo National Front chuan vawiin khan 'Remna Ni' vawi 40-na chu Mizoram hmun hrang hrangah an hmang a, MNF General Headquarters hruaituten an hmanpui a, MNF President chuan Tawi East & West Block huaihawt hmanna Thingsulthiah Community Hall-ah a hmanpui.

Zoramthanga chuan remna neih theihna tura sulsutu leh thawktu zawng zawng, Kohhran, NGO, Political Party te leh ram mipuite chungah lawmthu sawiin Remna Ni chibai a buk a. Vawiina Remna Ni an hman, MNF leh India inremna hi inremna zawnga hlawhtling ber, hunin a finfiah tawh niin, a rei tulh tulh ang a, a hlutna la hriat zual zel tur a nih tur thu a sawi.

Zoramthanga chuan MNF leh India inremnaah hian India Danpui chhunga Mizoram inhumhimna Article 371G pawimawh tak a tel a. He Article hi hnam Pasalthate sa lu hawn, nunna leh tawrhna tam tak nena hlawh chhuah Mizo mipuite pawhin tawrhna hrang hrang nena an hlawh chhuah a ni a; India Danpuiin Mizo hnam min venhimna a ni, a ti a. India Danpuiah Mizoram State chungchanga ruahmanna bik engpawh lo inziak mah sela, Mizoram State-ah hman theih a ni lo ang, tiin Mizoram chu thuneihna a pe a ni, a ti.

MNF President chuan Inremna avanga kan hlawh chhuah - Mizoram Special Provision Article 371G chelek a ngaih hunah tak, ZPM Sawrkarin hmang ngam lova FCAA 2023 pumpui an pawm mai kha Mizoram chhunga Mizote thuneihna central sawrkar kuta hlanna, Mizoram leh Mizo hnam tan thil pawi tak, thangtharte tan a la pawi dawn chauh, niin a sawi.

Zoramthanga chuan, "Kan Hnam Sipaite sa lu hawn, a bika kan humhimna neih, ZPM Sawrkarin Pu Lalduhoma hova central kutah an lo pek ngawt hi MNF a sawrkar leh hunah kan la let leh dawn a; Article 371G humhim ngam MNF hi Mizoram humhim turin a sawrkar leh ngei a tul bawk a ni," a ti bawk.

Mizo Hnam Run, Aizawl-ah Senior Vice President Dr. R.Lalthangliana hovin Remna Ni hi hman a ni a, Mizo Hnam Runa hmanna hi Lalruatkima Treasurer chuan a kaihruai a. Tukin zing khan Senior Vice President leh Treasurer hian Remna Run Luangmualah zalenna sual kum 60 tlin lawmna pualin thing an phun bawk. Dr.Thangtea hian Col. Lalrawnliana lehkhabu ziah 'Exodus Day leh Bangladesh War' tih chu a tlangzarh nghal bawk.

MNF MLA pute : Ramthanmawia - Hnahthial Mizo Hnam Run; Er.H. Lalzirliana - Vantawng Group YMA Hall, Thenzawl Bazar veng; K. Laldawngliana - Lungdai; Er. R. Rohmingliana-te chuan Lunglei, Mizo Hnam Run-ah Remna Ni hi an hmanpui a.

Tawnluia Ex-Dy.CM, NCC- Khawzawl Zaingen Hall; Vanlalzawma, Treasurer, Mamit Chhim veng Hall; K.Vanlalauva, NCC, Ex-Minister - Sesawng; R.Lalzirliana PAC, Ex-Minister - Serchhip; K. Lalrinliana Adviser, Ex-Minister- Kolasib Hnam Run; Er.Lalrinawma GS, Ex-Minister - Ni 100 Hall, Tlungvel; Dr. ZR. Thiamsanga GS, Ex- MLA -Thangtea Hall, Champhai Kahrawt; TJ.Lalnuntluanga GS, Ex- Minister - PD Sena Memorial Hall, Champhai Kanan Veng ; Er.K.Lalsawmvela GS chuan Phullen Community Hall-ah an hmanpui a. Lalnunmawia Pautu Vice President, MNYF Hqrs.hovin Ṭhiak-ah hman a ni bawk.