ZALEN February 1, 2026: Mizoram Legislative Assembly-a Leader of Opposition dinhmun chelh mek, Lalchhandama Ralte chu midanga thlak tumna a awm lo tih MNF hruaituten ZALEN an hrilh.

Leader of Opposition chungchang hi Dampa bial a Dr. R Lalthangliana thlan tlin a nih atangin sawi neuh neuh a awm chho a. Dr. R Lalthangliana hi MNF party-ah Sr. Vice president a nih bakah party leh politics-ah pawh senior zawk a nih vangin Leader of Opposition ni mai tur anga sawi a tam chho hle a ni. Tun dinhmuna Leader of Opposition ni lai Lalchhandama Ralte hi MNF party-ah vice president dinhmun chelh lai mek a ni thung.

Hemi chungchangah hian ZALEN zawhna chhangin, MNF vice president Vanlalzawma chuan, Leader of Opposition thlak tumna an nei lo tih a sawi a, Leader of Opposition ni lai Lalchhandama Ralte chu a ngai angin a kal zel dawn niin a sawi. 

Mizoram Legislative Assembly-a Leader of Opposition, Lalchhandama Ralte, MLA hian 14.12.2023 khan Assembly Secretariat Annexe Building-ah a office a luah lut a. Office a luah luh ni hian Lalchhandama Ralte chuan Leader of Opposition dinhmun luah thei khawpa thlawptu MLA a nei tling chu lawmawm a tih thu a sawi a. He dinhmun hi a awmna tura Pathianin a ruat a nih ngei a beisei thu leh ram leh mipui tan sawrkar khalh ngil tura theihtawp chhuah a tum thu a sawi.

Mizoram Legislative Assembly-ah hian Leader of Opposition tling phak turin MLA 10 talin Leader atana an pawm nih a ngai a, kum 15 chhung zet Leader of Opposition hi neih a lo ni tawh lo a ni. Lalchhandama Ralte, MLA, Leader of Opposition atana speaker-in a pawmna hi ni 13.12.2023 khan notification tihchhuah a ni.

The Mizoram Salaries and Allowances of the Leader of Opposition Act, 1999 in a tarlan danin, Leader of Opposition hi hlawh leh facilities-ah cabinet minister tlukpui a ni.