ZALEN March 2, 2026: MNF chuan vawiin khan Vanapa Hall-ah Mizoram Independence Puan kum 60-na 'Diamond Jubilee lawmna hun an hmang a, Jubilee thuchah sawitu MNF President Zoramthanga chuan Mizoram Independence puan kum 60-na tling thei tura MNF nunna zuah zel a la ni leh MNF Founder President Laldenga nupui Lalbiakdiki pawh thu sawi theia a la awm chu Pathian hnenah lawmthu a sawi. MNF chu kum 1961 din niin kum 65 hmel a hmuh tawh thu a sawi bawk. Hengte hi movement dangin an tih ve theih loh, Pathian remfel ang thlapa kal a ni, a ti.

Zoramthanga chuan, "India Independence lai khan E. Pakistan-a awm te, Burma rama awm duh te, India-ah emaw British hnuaia la awm zui duhte leh Independence duh te kan ni nawk hlawm a. August ni 15, 1947 khan Mizoram chu India ramah kan awm ta tih hre lo tam tak a hun lai khan an awm a, British lah an liam daih a, agreement sign leh ban phartirna pawh awm lovin India-ah khan kan awm ta ringawt a ni. Hei tak hi Pu Denga te khan India Prime Minister hnenah India chu Republic anih a, Constitution an siam lai khan, India siamnaah kan tel ve lo a, barhluih kan ni an ti a. India ramah kan tel ve dawn anih pawhin Mizoram tana tha leh him tur kan duhzawng kan sawi ve ang chu, chuti ni lova constitution in barhluih ringawt chu thil fello tak a ni an tih chu khatih laia Prime Minister Lal Bahadur Shastri pawh khan hnial ngaihna a hre lo, 'mithiamte ka lo rawn phawt ang e' a lo ti e," a ti.

"Hun a kal zel a, kum 1966 February ni 11-ah Assam Chief Minister Chaliha chu Pu Denga'n biain, 'Sipai kan tir lo ang in ti si a, enga ti nge in rawn tirh leh si?' tia a zawh chuan 'ka rawntir lut lo thei lo' tiin a lo chhang a. Pu Denga'n buai ai chuan Chaliha chu biak a tum leh a, Chaliha chuan a lo be duh ta lo a. Keini pawhin kan tih tur ngaihtuahin March ni 1, 1966 khan Mizoram Independence kan puang ta a, kan inkap tan ta a ni. Kum 20 chhung kan inkah hnuin kohhran, NGO leh pawl hrang hrang ngenna angin inremna entawntlak ber kan nei ta a. Electoral roll-a la awm lo thlan tlin hlim Chief Minister nihna Pu Denga'n a lan theite kha a inremna ropuizia tilangtu a ni. Kha inremna kha thenkhatin sawi bawrhban tum thin mahse, a hlutzia kan hre zel a ni," a ti bawk.

ZPM chungchanga sawiin MNF President chuan, "Pu Duhoma'n pawl hrang hrang dina kum 40 chuang zet a kalpui hnuah ZPM chu kum 2023 inthlanah khan an thlipui a tleh a, MLA 20 chuang zet neiin an sawrkar ta a. Mahse, mipuiin an hre chiang tulh tulh a, an mo thar laiin rulling lai an tlin ngei ngeina thin inthlan hrang hrangah an tla zel a. Sinlung Hills Council-ah te, Dampa bye-election ah te, LADC-ah te pawh an tla zel a ni. Nasa takin electric bill an tisang a, eng sawrkar mahin a la tih ve ngai loh petrol leh diesel man an tisang a, revenue tax hrang hrang a letin an tipung a, ration buhfai man a letin an tisang bawk. Sawhthing leh hmunphiah chingtute an mangang em em a, sawrkar hnathawkte pawh a ni telin ZPM sawrkarah an beidawng nasa hle. A tuka lang leh mai tur an hotupa berin dawt a sawi zuah zuah a, a hoten an chulmamsak zel a, a hote chulmam sen loh hutupa berin dawt a sawi thin a ni. Kawng lakah Pathianin MNF hi a kalsan dawn lo a, a hun a tihah Pathianin a chawisang leh zel thin a ni," a ti bawk.

Vawiin chawhma Dar 10:30 am khan D.Thangliana Ex-MLA, PAC & Chairman, Lungphun Sub-Committee kaihhruaina hnuaiah Pu Zoramthanga chuan Mizo Hnamrunah Diamond Jubilee lungphun a hawng bawk.

K. Lalthawmmawia PAC & Secretary Mizoram Independence Puan kum 60-na Diamond Jubilee Celebration Committee chuan report a pe a, Lalbiakdiki, Adviser w/o Laldenga, MNF Founder President leh Ex-MNA Association President Rochungnunga pawhin thu an sawi.

Diamond Jubilee lawmna hun hi MNF Sr. Vice President & Chairman, Mizoram Independence Puan kum 60-na Diamond Jubilee Celebration Committee Dr. R. Lalthangliana, MLAchuan a kaihruai a, Rev. Dr. Vanlalbela, Bawngkawn chuan hunserh a hmang.

MNF Vice President Vanlalzawma chuan Jubilee cake zai buatsaihin, inhlan tharna hun a kaihruai bawk a, MNF Treasurer Lalruatkima  chuan lawmthu sawiin hun a khar.