ZALEN May 26, 2026: Mizo National Front (MNF) chuan sawrkarin Tourism Director charge la tura R. Lalrodingi a ruat MZP-in an dodal chu an thlawp tih thuchhuah an siamah an tarlang a, he inrawih nawnna hi Mimal induhsakna hleihluak tak, mimal inkara inlaichin biknaah hian thil fello lianpui a awm em ni tih MNF chuan sawrkar a zawt.

Mizo Zirlai Pawl (MZP) te’n Tourism Director charge la tura sawrkar atanga pension tawh, R. Lalrodingi rawih nawn tumna chu an dodal a. R. Lalrodingi rawih nawn tumna chungchangah hi Chief Minister Lalduhoma nen pawh MZP te hian sawihona neiin an lo inbe tawh a. Chief Minister nena an inbiakna-a an thu dah ang ni lovin; sawrkar chuan Tourism Director charge la tura tihna order chu May ni 22-ah a chhuah ta a! 

Zirlai pawl lungawi loin Directorate of Tourism-a thawktu zawng zawngte chu ni hnih chhung an Pisa kai tur dang ta a, hetianga hnathawk thei loa staff zawng zawng an awm ta hi MNF chuan pawi an ti a. Hna thawh tur tam tak tih khaihlaka a awm te, anmahni dawrtu tur mipui te tan pawha rokhawlhna a awm ta te leh, harsatna dang lian zawk a thlen hmain a rang lama he buaina hi chingfel thuai turin MNF chuan sawrkar an phut.

MNF chuan R. Lalrodingi hi Additional Director, Commerce & Industries Department atangin April 2026-ah supernuation-in a pension a. OSD to Chief Minister atana ruat a ni a, hemi chungchangah hi chuan MZP te hian an dodal lo a, mipui pawhin an hrethiam niin a lang a, Chief Minister-in a thuneihna hmangin a ruat a ni ve mai a ni. A pension hnua Tourism Director mawhphurhna pawimawh em em chelh kawp tir a, Secretary Government of Mizoram status pek belh a la ni ta cheu mai erawh hi chu MNF chuan mak a ti a. MZP te’n an dodalna chung leh mipui lam pawhin mak an tih em emna kârah in-rawih zui dan hram sawrkar hian a zawng niin a lang a. 

Sorkar kalphung pangngai-ah chuan Tourism Department-a Joint Director ni mek hi Director puitling la qualify lo pawh ni se, charge lak tir mai tur a ni a. Tin, Department Secretary pawhin Director hi a kawp thei tho bawk. Hei hi, tun dinhmunah Mizoram sawrkar hnuaiah Department thenkhata an kal mek dan pawh a ni. Chutiang a nih loh pawhin Civil Service MCS/IAS emaw dah lailawk mai theih a ni bawk. Tuna sawrkar kal dan en hi chuan MZP te duh loh leh ngaihthat lohna hi MNF chuan an pawmpuiin a thlâwp tlat an ti a. Mimal induhsakna hleihluak tak, mimal inkara inlaichin biknaah hian thil fello lianpui a awm em ni tih pawh MNF chuan sawrkar an zawt a ni.