ZALEN September 24, 2026: MNF Thalai (MNYF) chuan Home Minister K. Sapdanga chu Chief Minister Lalduhoma'n hnathawk thei lovin a kut a phuarsak ta em ni, an ti.

MNF Thalai chuan ram hruaitute Lo zawh leh hlimhlawp bawla huau huau ringawt buaipui lovin dan leh thupek kenkawh kawngah nasa taka tan la turin leh ti tak takna nen Mizoram tan ke pena hnathawh leh zual turin an phut.

Mizoram rorelna sang ber Assembly House-ah Chief Minister berin Mizoram Police chungchang mawi lo taka a sawi khan Police-te phurna a tihniam nasa hleah an ngai a, khatianga Mizoram rorelna sang ber Assembly House a thu a chhakchhuak duh ta mai kha a mai a, Police-te hotulu ber Home Minister chu mahni hna pawh tlin lo leh Minister chak lo tak anga tlang hriata lantir a duh vang zawk a ni em tih hi kan zawhna a ni, an ti.

2025 khan Mizoram-ah tualthahna vawi 11 a thleng a, chu mai ni lovin kumin chhung ringawtah pawh tualthahna a thleng zing ta hle a. Kolasib district New Builum khaw mi, sipai chawlh hmanga lo haw Zakaria Lalhriattluanga, kum 29 mi thihna in India ram a deng chhuak a, national media hrang hrangah Mizoram a mualpho hle a, vawiin ni thlenga ram hruaitu lu ber ten thuchhuah an la nei miah lo te leh Home Minister-a ngawi tlat chu an dem thu an sawi.

MNYF chuan Mizoram-a tualthahna leh chhiatna a thlen fo laia Zoram mipuite thlamuan tura Home Minister thu leh hla hriat tur a awm loh laiin Chief Minister-in Home Minister hmakhalh leh lar khalh a tum ni awm hriama thu leh hla hmuh tur a tam tle thung. Home Minister zahawm tak hian a Department chanah hian thuneihna a la nei a nih ngai chuan Zoramin harsatna a tawh lai hian Zoram mipuite thlamuan turin thuchhuah zawmze nei, mipuite thlamuanna thuchah nei rawh se, an ti.

Home Minister ngawih rengna chhan hi Chief Minister-in a department chan pahnih a chhuhsak tawh a, Home Minister hi a tum thumna atana a department chan Home department thleng hian Chief Minister hian chhuhsak a tum leh ta em ni tiin MNF thalai chuan zawhna an zawt.

ZPM party hruaitu thar ruat a, ZPM party dintute zinga nasa taka hmalatu leh party tana thawh hlawh ber K. Sapdanga chanvo nei miah loh a dah nil-a a awm te, Chief Minister-in an party chhung inkhawma a um zui duh danah hian Chief Minister leh Home Minister inkarah hian thawhho hleih theih lohna leh khi thuk tak a awm tih a lang chiang hle a ni, an ti.