Aizawl: MNF Thalai chuan Mizo zirlai mi 15, Japan a tirhna ah NLUP sum nuai 165 hman a ni tiin heng zinga nuai 75 chu a awmna chin hriat a nilo niin an sawi. Nimin khan Aizawl Press Club-ah chanchinbu mite kawmin MNF Thalai President K.Vanlalvena chuan LE&IT Department chuan NEEC leh Silver Peak Japan te kaltlangin December 9,2015 khan Mizo thalai 15-te chu Kokoro College, Nagasaki-ah Japan tawng zir tura tirh an ni a, kum khat leh a chanve an zir chhungin an zirna atan zirlai pakhat zelah nuai 11, a vaiin zirlai 15 tan nuai 165 NLUP pawisa puk a ni a. Zirlai 1 zel hian nuai 11 hi kum thum chhunga an rulh zawh turin LE & IT Secretary leh NEEC Co-ordinator-ten inremna an ziak a; mahse, inremnaah hian Loan rultu tur zirlaite chuan hming an sign lo a, tun hnaiah hming sign-tir leh tum an ni a; mahse, zirlai tam zawk hian an senso nia sawrkar lamin an sawi hi a tam lutuk nia hriain an sign duh lo niin a sawi. MNYF President chuan he college a kal ve ram dang miten course fee-ah Rs. 5,00,000 chuang deuh chauh an chawi nia sawiin Mizo zirlaite hi an kal man leh ei man chhut pawhin mi pakhat zelah nuai 6 lo seng pawh nise zirlai pakhat ta tur cheng nuai 5 zel a bo thlau tihna a ni a, belhkhawma nuai 75 lai mai hi khawiah nge a awm tih MNF thalaite chuan kan zawt a ni, a ti. K.Vanlalvena chuan Mizo thalaite hi kum khat leh a chanve an zir chhung hian hna an thawh dawn avangin nuai 20 vel an hlawh hman dawn niin an sawi a; mahse, hlawh engmah an nei lo niin a sawi bawk.