ZALEN September 20, 2026: Mizoram Science, Technology & Innovation Council (MISTIC), Department of Science & Technology-in Mualpheng rama monorail an siam chuan tum khatah kg 500 phur thei tura beisei a ni a. Thlai phurhna tura duan hi kar tharah chuan hman tan theih tawh beisei a ni.

ZALEN-in MISTIC thawktute hnen atanga thu a dawn danin monorail an siam hi km thum vela thui a ni a, hei hian Aikawn zaua green house 40 vel leh a bul hnaia thlai tharte chu kawngpuiah a phur thei dawn a ni.

A kawng hi hmun thenkhatah chuan degree 45 vela awihte niin helai hmunah pawh hian harsatna awm lovin a kal thei a, khawl tihkalna atana hman petrol pawh a heh lo a. Hei bakah hian khawl pakhat chauh hmang niin gear pahnih a nei a, pakhat chu a nawr kaltu niin pakhat dang leh chu a hnung zaw­nga kaltirtu niin an sawi. 

MISTIC thawktute chuan tuna monorail an buaipui mek chu pilot project a ni tih sawiin a hlawhtlin chuan hmun hrang hrangah bun zel an tum tih an sawi a. Tuna an khawl bun chu Hindustan Agri Bussiness Private Limited siam niin state sawrkar ang chuan India-a bun hmasak ber nia an hriat thu an sawi a, a hming atan pawh ‘monorail for agriculture’ tih an vuah niin ZALEN an hrilh.

Monorail bunna atana Mualpheng ram an thlan chhan sawiin helai velah hian thlai chi hrang hrang, a bikin tomato leh hmarchapui an ching nasa a, hei bakah Aizawl atanga a hnaih bawk avangin enchhina atan hian an hmang niin an sawi.

Monorail chu thlai chinna hmun nghetah bun a ngai a, kum tina huan/lo neihna hmun sawn thinnaah chuan tih chi a ni lo tih an sawi bawk.

A hlawhtlin chuan hlawkna tam tak a awm thei dawn nia sawiin MISTIC thawktute chuan thlai chinna hmuna phurh chhuahna atana kawng laih thinin ramngaw a tihchhiat bakah leimin a siam thin a. Furah kawng a nalin lirthei tan kal a buaithlak thin a, mihring tha hmanga phurh hi a hautak bakah thlai a chhe duh a. Monorail-ah erawh chuan senso a tlem bakah hun leh tha a heh lo a, a hmanruate hi thiah mai theih a nih bawk avangin a awlsam zawk dawn niin an sawi.

Monorail enkawl zel dan tur zawhna chhangin MISTIC thawktute chuan, “Bul kan tanpui phawt ang a, a hnuah chuan society kutah emaw kan dah ang a, a enkawl hna leh tul dang an thawk ve ang a, khawl tui thunna tur pawh tlem tlem an la ve turah kan ngai,” an ti.

Chief Minister Innovation Challenge siamah department hrang hrangte ineltir an ni a, chutah chuan Department of Science & Technology pawhin project thehlutin monorail project hi pathumna atan thlan a ni a. Bana Kaih hnuaiah a ti tha thlanchhuahte hi project pek niin Department of Science & Technology hnuaia MISTIC chuan hma la zuiin Mualpheng ramah hian project an siam ta a ni.