ZALEN June 8, 2026 : MSU hruaitute chuan vawiin khan Chief Minister Lalduhoma chu a pisaah an hmu a. Mizoram Public Service Commission hnalakah thil tihsual awm thin chungchangte, Hnam dang (vai) in Mizo hminga Official document atana hming thlak chungchang leh BSF hnaruaka Mizoram Quata hnamdangin document lem hmanga an zawm chungchang an thlen.  

MSU hruaitute chuan Chief Minister hnenah hian Mizoram Public Service Commission inthlahdah avanga Sawrkar hnalakah buaina a awm fo chu tha lo an ti a. Tun hnaia Jr. Grade of Legal Service hnalakah buaina thar a awm leh chu pawi an tih thu an thlen bawk. Mizorama hnalakna awmchhun leh Group A Officer thlenga post sang zawk latu MPSC berin tihsual an nei ta fo hi ngaihzam a har thu leh an ngaih thutak viau thu MSU chuan CM hnenah hian an thlen a. MPSC Chairman hian a hnuaia hnathawkte a vil tha tawk loah an ngaih vangin bang ngam tura thurawn pe turin an ngen a ni.  

May 27, 2026 (Nilaini) Vanglaini chanchinbu chhuak phek 5-naah Hnamdang (Vai) Mizo hminga Official Document-a hman tur atana hming lo thlak an awm chungchang an thlen bawk a. Hetia hnam dangin Mizo hminga hming an thlak fo chuan ILP exempt tumna leh Tribal Certificate neih tumna tha lo tak a hrinchhuah theih avangin tihtawp anih theih nana hma laksak turin an ngen a ni.  

Hemi bakah BSF-a Mizoram Quata hnawhkhat tura Document dik lo siamtu mi pariat tun thlenga man chhuah an la nih loh chungchang pawh thlen a, a ranglama Chief Minister hi hma laksak turin an ngen a ni.  

Chief Minister chuan MSU te thil thlen chu pawimawh tak tak anih thu leh theihtawpa a lo bawhzuisak tur thu a sawi a ni.