ZALEN May 15, 2026: National Student Union of India (NSUI) chuan tun hnai thla li chhung leka MPSC-in Exam lian leh pawimawh tak MCS Combined Exam leh MES Exam-a tihsual lian tak tak a nei chu hriatthiam theih niin an hre lo a, thla tin tih sual pawi tak pakhat nei ziah ang an nih thu an sawi.

Vawiina Aizawl Press Club-a chanchinthat thehdarhtute an kawmnaah NSUI President C. Lalhriatpuia chuan MPSC-in May 13, 2026 a Junior Grade of MES (Combined Competitive) Examination 2025 final result an tihchhuah-ah mi 65 an tling a, heng zinga Electrical & Electronic Engineering Wing bikah phei chuan post 7 lak turah mi 8 tih tlin an ni a ti a, May 14, 2026 khan thupha chawina an siam hial a ni, a ti.

NSUI President chuan, "MPSC-in February 2, 2026-a MCS (Combined Competitive) Exam 2025 result tihchhuah fel lo a awm avangin siamthat a lo ni tawh bawk a ti a, tun hnai thla 3 chhung lekah MCS Combined exam leh MES exam-a tihsual lian tak tak a awm hi hriatthiam theiha kan ngai lo, MPSC history-ah pawh thil thleng khat tak a ni.

Kum 2025 atanga tun thleng, kum 1 leh thla 4 chhung hian MPSC thuchhuah tawh siamthatna vawi 15 a awm hi a makin, fimkhur tawk lovah kan ngai a, kum khat leh thla li chhung hian thla tin tihsual pawi tak pakhat tal an nei ziah tihna an ni," a ti.

NSUI chuan Chief Minister Lalduhoma'n MPSC thuam chak an tum thu a lo sawi tawh a, hmalakna engemaw chen awm bawk mah se, tuna MPSC chetsual nasa dan en hian a la tawk lo niin a lang a, chuvangin, MPSC thuam chak hna nasa lehzuala thawk turin Mizoram Chief Minister chu an ngen a, tun hnuah hetiang thil hi thleng nawn tawh lo se an duh thu an sawi.