ZALEN July 8, 2026: Mizoram Police Subordinate Officers’ Association (MPSOA) chuan Mizoram Sawrkarin tunhnaia Sawrkar hnathawk a laknaah dik tak a, a thiam leh a tlingte chauh lak an ni thin hi Mizoram Police Subordinate Officers’ Association (MPSOA) chuan lawmawm an tih thu thuchhuah an siamah an tarlang.

MPSOA, General Headquarter chuan 25.8.2025 atanga training mek, Mizoram Police Constable 259 (Unarmed/Armed/Mechanic) laknaah pawh Party leh mimal induhsakna tel hauh lovin a tling leh titha te ngei lak anni kha lawmawm an ti a, Mizoram Sawrkar chungah thinlung takin lawmthu an sawi a ni. 

Mizoram Police Manual 2005 hman hnuah a vawi khat nan, kum 19 ral hnuah Mizoram Police Manual 2005 ang thlapa Class-X (HSLC) pass chinte Constable atana lak an nite hi Mizoram Police tan hmasawnna mellung pawimawh tak a ni, an ti bawk. 

MPSOA tuna SI (UB) post 25 recruitment kal pui mek te, approval awm tawh recruitment la kalpui leh tur SI (UB) leh ASI (UB), ASI (M), Constable 350 (UB-150, AB-200)] ah te pawh hian dik tak leh huaisen taka kal zel turin Mizoram Sawrkar an ngen bawk a ni. 

Subordinate level rank hrang hranga post ruak, SI (UB) 62, ASI (UB) 33, Constable 756 (UB), ASI (M) 120, MPRO (H/C 230, Constable 32), F&ES 57 & Constable (AB) 2757 avaiin 4047 vel awm mekte pawh hi hnawhkhah thuai a nih theih nana hma min laksak leh turin Mizoram sawrkar an ngen bawk a ni.

Mizoram Sawrkar-in ‘Assistance to States and Union Territories for Modernisation of Police’ (ASUMP) Scheme kaltlanga Mizoram Police te hman tur Motor thar 219 an pe chu lawmawm an ti a. Ground level-a Police hna bulpui ber thawktu Police Station, Out-Post leh Beat Post 60 laiin a ruala motor thar an dawng vek thei chu ropui tiin lawmthu an sawi.

Heng hmasawnna thar Mizoram Police-in an neih theihna tura theihtawp chhuaha hmalatute, Mizoram Sawrkar hruaitu, a bikin kan Chief Minister, Home Minister leh a thawhpui Home Department Officer leh Staff-te chungah te, Police Headquarters-a an hotute chungah te MPSOA, General Headquaters chuan lawmthu an sawi bawk a ni.