ZALEN, February 08, 2026: India ram pum huapa kawng rualrem lova bike intlansiakna, MRF MoGrip Supercross National Championship 2025 Grand Finale-ah Private Expert Class ah 3-na niin podium a lawn leh, intlansiak vawi ruk atangin nomawi pathum a la thei.

Visakhapatnam, Andhra Pradesh-a Grand Finale intlansiak hi Inrinnia neih kha niin MRF MoGrip Supercross National Championship 2025 zo taa Round 6 a ni bawk a. College Veng, Aizawl tlangval, Shaun-a hi mi mala tel niin Private Expert Class-ah 3-na a ni leh.

Kum 24 mi, Shaun-a hi November thla tawpa Navelim, Goa-a championship Round 5 intlansiakah Private Expert Class-ah 2-na ni tawhin November thla tira Raipur, Chhattisgarh-a Round 4 intlansiakah Private Expert Class-ah 2-na a ni tawh bawk a, tun season-ah dawnsanah vawi thum a lawn thei a ni.

Visakhapatnam-a intlansiakah hian class dangah pawh Shaun-a hi a inlan a, tlan laklawh laia a bike a chhiat avangin a tlan chhunzawm thei lo va, lawmman la phain a awm thei ta lo hlauh a ni.

Tun championship-a a chet that avangin National Supercross Championship Ranking Private Expert Class-ah 2-na a ni nghal bawk.

Shaun-a hi nikuma he inlanna a tel khan Mizoram atanga tel hmasa ber a ni a, kuminah a inlan nawn leh a, nikumah khan dawhsan vawi li lai lawn phakin a awm nghe nghe.

Thawhlehni hian Aizawlah haw tumin a inruahman a, lawmman la theia a awm chu Pathian vang chauh a nih thu leh amah tana lo tawngtaipuitute chungah lawmthu a sawi.

Shaun-a hi Mizoram Motorsports season kharna, LBS Suzuki Racing Championship-ah December thla khan kawng chhiaa intlansiak moto-cross expert-ah a champion tawh bawk.