ZALEN, Apr. 21, 2026: Mizoram State Sports Council (MSSC) Awards 2025 sem chhuah takah 2025-26 chhunga khawvel huap badminton inelnaa medal pali latu, C.Lalramsanga chu Sportsman of the Year 2025 chawimawina hlan a ni a, hmeichhiaah India hockey team inngahhna tling, Lalremsiami Hmar Zote thlan a ni a ni bawk.

Mizo shuttler hriat hlawh, Ramsanga hian 2025-26 chhungin a che tha hle a, October thlaa Guwahati, Assam-a Yonex Sunrise BWF World Junior Championship, 2025-ah khan mixed team-ah bronze medal lain August thla khan Kotak India Junior International Series-2025 (BWF Junior Ranking Tournament)-ah men’s doubles-ah silver medal a la bawk.

August thla veka Hyderabad, Telengana-a India Junior International Grand Prix (BWF Junior Ranking Tournament) khelhah mixed doubles-ah silver medal leh Kotak India Junior International Series-2025 (BWF Junior Ranking Tournament)-ah bronze medal a la bawk.

National level-ah phei chuan Ramsanga hian medal paruk zet a la a. Heng zingah hian November thlaa Itanagar, Arunachal Pradesh-a Yonex Sunrise 48th Inter State-Inter Zonal & Junior National Badminton Championship 2025-a boy’s doubles leh boy’s team-a gold medal pahnih a lak a tel.

Heng bakah hian silver pathum leh bronze medal pakhat a vaw chhuak bawk.

Hmarchhak huap inelnaah pawh Ramsanga hian September thlaa Agartala, Tripura-a Yonex-Sunrise North East Zone Inter State and Zonal Badminton Championship 2025 khelhah boy’s team-ah gold lain men’s team-ah bronze medal a la bawk.

Hmeichhe lama a tha ber chawimawina dawngtu, Siami hi hockey-a India hmeichhe team innghahna pakhat niin tun thlengin vawi 180 chuang ram tan a feh chhuak tawh a. Kumin kum tir khan India-a infiamna huanga chawimawina sang ber dawttu, Arjuna Award dawng thei tura chhawp a ni nghe nghe.

Women’s Asia Cup 2025-ah khan Siami hian India chu silver medal a lakpui a. Women’s Hockey India League (HIL) 2025-26-ah Shrachi Bengal Tigers chu pahnihna nihpuiin final-a SG Pipers laka an tlawm tumin goal a thun nghe nghe a, shootout-ah an tlawm zui ta hlauh thung.

India team chu FIH Hockey Women’s World Cup 2026 khel thei turin a tlinpui bawk.

Mipa leh hmeichhiaa sports person tha berte hian trophy bakah Rs. 1,50,000 ve ve an dawng.

MSSC Awards 2025 hi Thawhtanni khan R. Dengthuama Hall-a MSSC Golden Jubilee lawmna inkhawmah sem a ni.

MSSC AWARDS AWARDEES

MSSC SPORTSMAN OF THE YEAR AWARD 2025 - C. Lalramsanga, Badminton - Trophy & Rs. 1,50,000

MSSC SPORTSWOMAN OF THE YEAR AWARD 2025 - Lalremsiami Hmar, Hockey - Trophy & Rs. 1,50,000

MSSC MOST PROMISING SPORTSMAN OF THE YEAR AWARD 2025 - H. Lalthazuala, Badminton - Trophy & Rs. 80,000

MSSC MOST PROMISING SPORTSWOMAN OF THE YEAR AWARD 2025 - Lalrempuii, Badminton - Trophy & Rs. 80,000

MSSC SPORTS TEAM OF THE YEAR AWARD 2025 - Mizoram Amateur Taekwondo Association (MATA) Team - Trophy & Rs. 1,00,000

MSSC COACH OF THE YEAR AWARD 2025 - Lalinpuia, Taekwondo - Trophy & Rs. 80,000

MSSC LIFETIME ACHIEVEMENT AWARD - Lal Thanhawla - Trophy & Rs. 1,00,000

MSSC BEST PERFORMING SPORTS ASSOCIATION OF THE YEAR AWARD 2025 - All Mizoram Karate Association (AMKA) - Trophy & Rs. 2,00,000

MSSC SPORTSPERSON OF THE YEAR FOR PERSONS WITH DISABILITIES AWARD 2025 - David Lalremruata, Judo - Trophy & Rs. 1,00,000

MSSC SPORTS PROMOTER OF THE YEAR 2025 - Dr. Lalmuanpuia (L) - Trophy & Rs. 50,000