ZALEN August 05, 2026 : Mizoram Tipper Association (MTA) Joint Committee ten niminah khan Mamit District, Dialdawk-ah permit nei lo hnam dang khalh lirthei atangin teak thing thahnem tak an man.

MTA Joint Committee chuan hnam dang khalh registration plate vuah lo Tata signa tipper, (DTO a hnam dang hminga register MZ 11 0234) chu lo check in, balu-a chhilh hnan teak thing tam tak chu an man a, Forest Department kutah an hlan nghal a ni.

MTA Joint Committee chuan Assam-ah Mizo lirthei dik lo taka balu phur anga puh man an ni a, Mizoramah pawh Mizo leh vai thliar loa dan bawhchhetute chu dan anga hrem vek turin thuneitute an ngen a ni.

Forest Department hnenah lirthei neitu Jakir Hussain, Hailakandi leh driver Misbar Hussain Laskar te chungah Mizoram Minor Mineral Rules, 2023 Rule 46 anga hma la turin an ngen bawk.

MTA, Aizawl; MTA, Kolasib leh AMCTA te chuan an hmalakna hi mimal beihna ni loin ram leh hnam tana dan bawhchhiatna dodalna a nih thu an sawi a. Mizoram chhunga sumdawnna dan hnuaia thianghlim taka a kal zel theih nan sawrkar department leh mipuite thawhpui turin an ngen bawk.

Tarlan tawh angin tipper khalha ei zawng pawl pathumte chuan inthurualin State dang atanga balu phur lirthei Mizorama lut turte chu August ni 1 atangin an dang tan a, chhun zan zawmin balu phur luh dangin an duty a ni.