ZALEN, Mar. 22, 2026: 22nd Mizoram State Muaythai Championship 2026-ah gold medal 19 nena medal 31 latu, Main Training Centre (MTC) chuan team champion an ni a. Mi mal chawimawina ngaihhlut hlawh, best fighter-ah mipaah Benjamin C.Lalrempuia leh hmeichhiaah Remtluangpuii thlan an ni thung.

Inelna hi Thawhlehni atanga khelh tan kha niin Inrinni khan Mizba Boxing Hall, Ramhlun Sports Complex, Aizawlah Mizoram University (MZU) Vice Chancellor Prof. Dibakar Chandra Deka-a hovin kharna hun hman a ni.

State championship-ah hian fighter 119 an tel a. Aizawl khawpui pawn khaw sarih atangin fighter inlan an awm a, khawpui chhunga club, gym leh training centre sawm pali an tel bawk a. Inelna enkawla thununtu (official) 15 an awm bawk.

Team champion, MTC, Edenthar, Aizawl hian gold medal 19 bakah silver pakua leh bronze pathum lain an fal hle a. 1st runners-up SPES Martial Arts Academy, Dawrpui Contact Sports chuan gold 10, silver pakua leh bronze medal pakhat an la a. 2nd Runners-up CT Academy, Tanhril chuan pahnihna an hnaih hle a, gold an lak zat tho lain silver pathum leh bronze pathum an la ve thung a ni.

Aizawl pawn lam atanga inlan zinga mi, Vairengte Muaythai Club hnenah Best Dicipline Trophy hlan an ni bawk.

Male Best Fighter Benjamin-a hi SPES/Dawrpui Contact Sports hminga inelnaa tel niin Female Best Fighter Remtluangpuii hi CT Academy a ni ve thung.

Inelna kharna hun hmanpuitu, MZU Vice Chancellor Deka chuan Muaythai Association of Mizoram (MAM)-in an ngen angin muaythai chu university games-ah chawi san (promote) a nih theih nan theihtawp chhuahsak a tum thu a sawi.