ZALEN July 2, 2026 : Mizoram Health Care Society chuan vawiin khan Mizoram Journalist Association (MJA) te chu 'Sensitisation on MUHCS for MJA members' hun an hmanpui a, MUHCS chungchang zirchianna leh inhrilhfiahna hun an hmang a, he scheme AB-PMJAY hmanga zawmtu Golden card nei te chu sum hmang hnem ber an nih thu sawi a ni.

Mizoram Universal Health Care Scheme chungchangah hian resource person pathum - Dr. K. Lalnghinglova, Chief Financial Officer, MSHCS ; Dr. C. Vanlalduhsaka, Medical Officer, MSHCS leh Lalzirtira, Informatics Officer, MSHCS te chuan zirtirna an pe. MUHCS hman dan chi hrang hrang bakah a kalphung te, damdawi in a awm kher lo ten an hman theih dan a, he scheme in a huam loh natna leh damdawi in a awm pawh ni se, a huam loh thil te an sawi.

MSHCS Chief Finanacial Officer Dr. K. Lalnghinglova, MFAS chuan MUHCS 1.0 ai chuan 2.0 zawmtu an pung tih a sawi a, General category-ah phei chuan a let aia tamin an pung a ti a, kum kalta khan 20,198-in an zawm laiin kuminah chuan 49,927 in a zawm thu a sawi. Sawrkar hnathawk leh Pensioner hi chu che reng a nih avangin figure dik tak hriat theih a nih lo a ti a, a danglamna a tam lo a, AB-PMJAY chu a hranpa a inziahluh ngai lo a nih avangin a danglam lo a ti.

Health Care enkawltute chuan an sum hmuhna an sawi-ah State GIA chu an sum hnar lianber a ni a, Sawrkar hnathawk thawhkhawm chuan a dawt a, PMJAY atanga an sum hmuh chu a pathumna a ni a, enrolment fee pensioner te thawh khawm leh Corpus Fund Interest te chu an pawisa hmuhna a nih thu an sawi. State GIA tum hi 58% a nih laiin PMJAY te sum thawh hi 9% chiah a ni a, sawrkar hnathawkte tum hi 10% a ni, an ti.

Data atanga a lan danin MUHCS hmangtu 70% te hi AB-PMJAY hmangtu Golden card nei an ni a, an enrolment fee hi central tum sak a ni a, chhungkaw khatah Rs. 1,052 central-in hian a tum a, hemi a 10% hi state tum a ni. Mizoram-in Golden Card a neih theih zat 2,16,000 chu central hian 90% tum mah se, enrolment ti hi chhungkaw 2,22,943 an awm avangin chhungkaw 6,943 chu Mizoram sawrkarin MUCHS-ah hian enrolment kum tin a tum sak leh bawk a ni.

2025-2026-ah khan MUCHS atanga hamthatna dawngtu 68% chu AB-PMJAY hmangtute an ni a, Sawrkar hnathawk hi 12% an ni a, General enrolment ti ho hi 16% niin Pensioner te 8% an ni. Bill pekchhuah atangin AB-PMJAY hmangtute pawisa hman hi Vbc. 80.79 niin Sawrkar hnathawkte hman chu Vbc. 43.81 a ni a, General ho hman hi Vbc. 37.48 niin pensioner te hman hi Vbc. 29.48 a ni.