ZALEN February 9, 2026: Health Minister Lalrinpuii chuan vawiin khan MUP building chhawng hnuai berah thalaite chawlh hahdamna hmun tur safe place of talk (SPOT) a hawng.

Hawnna thu sawiin Minister chuan, "Mizoramah HIV a hluar nasat avangin theihtawp chhuaha kan zavaia kan tan tlan a ngai a. SPOT hawn tak hi thalai ten taksa hrisel an neihna hmun tur atana duan a ni," a ti. Lalrinpuii chuan HIV lakah fimkhur a ngai tih sawi bawkin, "Mizorama HIV inkaina tam ber 70% hi mipat hmeichhiatna (sex) atanga kai a ni a, kawppuite laka kan rinawm a ngai a. Heti tak maia kristian ram nisi HIV a hluar hi a zahthlak hle a ni," a ti bawk.

Mizoram State AIDS Control Society (MSACS) project director Dr. Jane Rinsangi Ralte pawhin thu sawiin, "SPOT hi thalaite rilru hahna chhawktu tur leh an harsatna tawh tanpuina hmun tur a ni a. Hetiang hmun hi thla thar hian Lunglei, Champhai, Kolasib leh Siaha district-ah te hawn leh tum a ni," a ti bawk.

SPOT-ah hian councillor 2 awmin thalaite rilru hahna leh mamawh an neih ang ang te puihna atana din a ni a. A duh leh mamawh apiang te tan Thawhtanni atanga Inrinni thleng zing dar 10 atanga tlai dar 4 inkarah pan theih a ni dawn a, thalaite mamawh zualpui pawh dah tum a ni bawk.