ZALEN September 24, 2026: Mizo Zirlai Pawl Assembly vawi 70-na chu Darkhawpui Rûn, Darlawn-ah September ni 23, 2026 (Nilaini) zan khan Assembly Hawnna leh Palai lawmna Inkhawm an nei a, vawiin khan Vantlang Inkhawm hman niin Home Minister K. Sapdanga chuan Khuallian niin a hmanpui.

Khuallian K. Sapdanga chuan India ram state thenkhatah MZP ang chi zirlai pawl hi an awm nual a, a tlangpuiin political party sponsored zirlai pawl an ni hlawm. MZP a danglamna chu chutianga sponsored a ni ve lo a, Sawrkar nena tha taka thawk ho tur leh a tul hunah chuan Sawrkar pawh huaisen taka thurawn pe thin tu a ni a. Eng issue-ah pawh hian rilru fim tak put a tha a, huai chu tha viau mah se, rum kher a tul loh thu a sawi. 

Khuallian chuan, "Zirlaite hian Hnam kan vei dan huang kan zauh a ngai hle a, state pawn lama hmun pawimawh hrang hrang tlawh leh dawr a ngaih chang hian, Mizoram mi leh sa kan tlem em em a, Mizoram state sawrkar hmun pawimawh-ah ngei pawh Mizo awm tur IAS, IPS kan awm mang tawh lo a, a tuimite chu All India Service-ah leh Central Service-ah luh tum sauh sauh turin a fuih a. UPSC hnuaiah Civil Service kan zuam lo a nih pawhin Staff Selection Commission hnuaiah Central Ministry hnuaia thawh tur hna tha tak tak exam tur a awm reng," tiin zirlaiten ngaihven thar tur leh State pawn lamah nasa leh zuala thawh tum turin zirlaite a fuih a ni. 

Faina chungchang sawiin, "Fai hi changkang a, Changkanna teh fung hmasa ber a ni, a pawimawh viau bawk. India ram puma State Capital zawng zawng zingah kan khawpui Aizawl hi khaw fai tehnaah 9-na kan ni a, a lawmawm viau rualin hmasawn zel tur kan ni a, Keini aia khawpui fai zawk 8 lai an la awm a, fai ber turin a let 8-a tan kan lak a la ngai. Fai tura tih tur hmasaber leh pawimawh ber chu bawlhhlawh control a ni a. Supreme Court chuan India ram puma mi zawng zawng zawm tur bawlhhlawh sawngbawl dan khauh tak a puang a, kan duh emaw, duh lo emaw kan zawm tur a ni a, kan tang anga kumin chhungin kan inbuatsaih anga nakumah zawm kan tum ang," tiin zawm theitu ni theuh turin Palai kalkawmte a chah a ni. 

Vantlang Inkhawm-ah hian MZP President Dr. C. Lalremruata chuan, "Mizo Zirlai Pawl (MZP) chu Kum 1935 a din tawh niin, rambuai avangin pawl pawhin a tuar a, a chak lo chho hle a, 1993 ah dinthar leh niin, tunah hian MZP hi Kum 90 lai kan lo tling ve ta a ni. Zirlai pawla inhmang te hi mi fing bik, mi fel bik kan nih loh avangin han chet fuh loh changte pawh kan nei tawh thin ngei ang, amaherawhchu Ram leh Hnamin chhan a ngaih apiangin mipui ten khawnge MZP a awm an ti a, mipuiin min auh hmain kan lo che chhuak fo tawh thin, Kan lo che har deuh a nih pawhin mipui te beiseina hriain he pawl hi a che chhuak fo thin a ni," a ti. 

President chuan, “MZP hre chianglo leh Pisa ah pawh vawi khat pawh la lut lo, MZP Dan Bu pawh la chhiar lo leh MZP-in ram leh hnam tana a thawh te hre duh miah lo ten nasa takin min sawisel a, he pawl hi ding tlak lo hialah chhuahin thiah a tul thute an sawi fo thin a ni; MZP chuan Pawl hmalakna tur reng reng hi ngun taka ngaihtuahin Committee-in a rel thin a, MZP hian huanglo kan neilo a, kan pawl thil tum ang zela kalin Committee-in ram leh hnam, zirlaite tana tha tura a ngaih-ah chuan hma kan la mai thin a ni,” a ti. 

Tlang hrang hranga MZP hruaitute chu Dikna, Rinawmna leh huaisenna nena hna thawk zel turin a sawm a, pawl thil tumah kan hmuh angin, Ramleh Hnam hmasawn theih nana Sawrkar tanpui tu ni turin a chah a, amaherawhchu tu pawh Sawrkar se an dik lohna-ah chuan huaisen taka dodal ngam tu ni turin a chah bawk. 

Khuallian hian MZP Chanchinbu Special Issue, MZP Assembly atana buatsaih chu tlangzarhna a nei nghal bawk.