ZALEN May 24, 2026: Mizo Zirlai Pawl chuan tun hnaia Mizoram Public Service Commission (MPSC)-in AH&Vety department hnuaia Jr. Grade of MAH&VS hna laknaah thil fel lo a awm ngei niin an hria a. MPSC thuneitute chu an thil tih dik tawk loah mawhphurhna la ngam tur leh he recruitment process zawng zawng pawh hi May 29, 2026 (Zirtawpni) hma ngeia a bul atanga tan that a nih theih nana hma la turin an phut.

Nimin khan Aizawl Press Club-ah chanchinbumite kawmin MZP hruaitute chuan he hna lak chungchangah hian MPSC thuneitute an hmu tih sawiin Controller of Examination chuan thu dik tawk lo a hrilh niin an sawi a. MZP President Dr. C. Lalremruata chuan, “He hnalak chungchangah hian April 27, 2026 khan MPSC chuan written result a tichhuak a, post li lak tur a nih laiin written result chhuakah mi pathum chauh tihtlin an ni a. He hna diltu zingah MPSC-in October 24, 2026-a valid list a tihchhuahah mi 101 an awm a. Chung zinga mi 74-te chuan written exam hi an hmachhawn a. Written result chhuakah mi pathum chauh an tling chu mak tiin MPSC lam zawh fiah an ni a, written exam hmachhawn zinga mi 71 ten written exam an paltlang loh chhan chu MPSC online form/portal-ah Veterinary Council registration an upload loh vang niin MPSC chuan an sawi a. 

MZP-in a zirchianna-ah mi 71 reject/disqualified hnen atangin MPSC form, online portal an fillup lai hian Veterinary council registration certificate upload-na tur option/slot a awm loh thu leh online form-ah hian ‘Others’ tih option pawh an fill-up hunlai hian a awm loh thu hriat a ni a, chuvang chuan MPSC website-ah technical problem a awm theih avang leh valid list tihchhuah tawh candidate zinga written exam hmachhawn mi 71-ten hetiang harsatna an tawk hi MPSC lam management fel tawk loh vangah MZP chuan a ngai a ni,” a ti.

MZP president chuan tun hnaiah MPSC hian hna lak an kalpui tawh leh an kalpui mekah an tal buai nasain tihsual an ngah tih sawiin sawrkar chu MPSC thuam chak turin an ngen tih a sawi bawk.

MZP chuan tun hnaia pension tawh mi pakhat tourism director-a dah a ni leh chu sut leh ngei nise an duh tih an sawi bawk a. Hemi chungchang hi May 13, 2026 khan chief minister hovin sawiho a ni a, tourism director-ah pension tawh dah a ni chu an duh loh thu sawiin chief minister pawhin an ngaihtuah nawn dawn thu a sawi a. MZP duh dan anga sawrkar a kal dawn emaw tih laia duhsak bik neia thil an ti chu MZP chuan pawi a ti hle tih an sawi.

Director a ruatna order hi sut leh ngei nise an duh tih sawiin sut anih loh chuan an kal zel dan tur chu committee-in a la rel dawn niin an sawi bawk.