ZALEN May 7, 2026 : Mizo Zirlai Pawl General Headquarters chuan Executive Committee an neih a Mizoram sawrkar hnuaia hnathawk pension tawh rawih nawn (re-employment) chungchanga an thutlukna chu vawiin khan Aizawl Press Club-ah chanchinthar thehdarhtute hmaah an puang a, pension rawih nawn chu Mizoram mipuite leh thalaite hmusitnaah an ngaih thu an sawi.

MZP chuan tunhnaia pension tawh rawih nawn awm chu ngun takin an ngaihtuah a, tunhma atangin pensioner rawih nawn hi nasa taka dodalin, duh lohna lantir a lo ni tawh thin a, tuna pensioner chungchangah pawh hian MZP ngaihdan á la ngai reng a ni, an ti. 

MZP chuan sawrkar hnathawk ruai nawn lo tura thuneitute kan ngen reng lai a MZP ngenna ngai pawimawh lo a, sawrkarin a ruai nawn hi Mizoram mipuite leh thalai hna zawng mekte zah lohna leh hmusitnaah a ngai a. Pension rawih nawnna order chu May Ni 14, 2026 (Ningani) ral hma ngeia sut turin Mizoram sawrkar thuneitute an ngen a ni. 

MZP chuan Sawrkar hnathawk pension rawih nawn awm fo thin chu tunhma atangin tha a tih loh thu a lo au chhuahpuiin, pension tawh rawih nawn (re-employment) an nih avanga bang tura nawr pawh a lo nei tawh thin a, chutiang thil thlen ngailo tur chuan thuneitute pawh a tul anga hma la turin an ngen nawn a ni.

Sawrkar hnathawkte chu an hnathawh hun chhunga thahnemngai taka thawk turin an ngen a, an pension hnuah erawh thalai hna zawng mekte kian turin MZP chuan an duh a ni.