ZALEN July 31, 2026 : Vawiin khan MZP General Headquarters, Aizawl kaihhruaina hnuaia All Political Party -Zoram People's Movement (ZPM), Mizo National Front (MNF), Mizoram Pradesh Congress Committee (MPCC), Bharatiya Janata Party (BJP) leh Peoples' Conference (PC), te kalkhawm chuan Election Commission of India (ECI) in Special Intensive Revision (SIR) 2026 Mizoram-a a kalpui mek chungchang an sawiho a. Lungrual takin thawhho nise an ti a, thawhhona tur thutlung a hnuaia mi ang hian siamin party tin General Secretary leh MZP General Secretary ten hming an ziah hnan.

Mizoram-a SIR 2026 kalpui mek chu khua leh tui dik tak te dikna chanvo humhimna a nih avangin felfai taka kalpui a nih theih nan thawh ho zel nise an ti.

Hearing neih mekah khua leh tui dik tak nilo, E-Roll a luh tum te chu pui lo tur leh tumahin tan lo turin tanrual tha an ti a, political party zawng zawng pawhin hemi chungchangah hian mahni party tinah hriattirna tihchhuah nise an ti.

Document lem hmanga E-Roll a luh tum an awm chu an dem a, hetiang hmuhchhuah te chu thuneitute hnenah hriattir zel nise an ti.

Hearing neih mekah Official te fimkhur taka hmala turin an beisei a, hna thawk theilo te chu dan anga an phu tawk hremna pek ngei nise an ti.

Hearing neih hun hi fur lai a nih avang leh thingtlang khaw kil khawr tak taka, kawng chhe tak tak paltlang ngai a nih avangin ERO, AERO te an hah in, an indaihlo em em a, Last date August 4, 2026 chu SIR 2026 felfai zawk neih theih nan a hun hi pawtsei tura ngen nise an ti.

All Political Party nen hmalak ho dan tur inrawnkhawmna hi neih a nih hnuah heng party aiawh leh MZP hruaitute hian Joint CEO Ethel Rotluangpuii, MCS an hmu nghal a ni.