ZALEN July 14, 2026: Pachhunga University College NSS unit chuan vawiin khan Civil Hospital, Aizawl tan thisen unit 158 an pe.

Blood donation camp hi Association for Voluntary Blood Donation ngenna anga huaihawt a ni a; PUC Seminar Hall-ah buatsaih niin, Aizawl Civil Hospital Blood Centre-a thawkte'n kal chilhin thisen an la a, zirlai mipa 103 leh hmeichhia 55 ten thisen an pe a ni.

MZU hnuaia college-te'n July 10, 2026 khan academic session 2026-27 atan class an tan a, Aizawl Civil Hospital Blood Centre-in thisen an mamawhna a san avangin, Association for Voluntary Blood Donation (AVBD) ngenna angin PUC hian vawiin khan blood donation camp an buatsaih nghal a ni.

World Donor Day puala June 17, 2026-a Thisen pe tha lawmman sem a ni a, thisen pe zingah Kohhran thalai an thawh hlawk ber a, pawl ang chuan National Service Scheme, Mizoram-a unit hrang hrang te chu thawhhlawk berin niin pakhatna an ni a, 'Overall Award' an la.

College leh University huangah NSS Pachhunga University College chu thisen pe hnem ber niin tum ruk camp atangin unit 946 an pe a, pahnihna NSS Unit, Govt Aizawl College chuan camp tum 5 an neih atangin unit 823 an pe a, camp tum riat nei NSS Unit, Govt Hrangbana College chuan unit 653 an pe a, pathumna an ni.

AVBD chuan tunlai hian Civil Hospital, Aizawl Blood Bank-ah thisen pek khawm sa, a mamawhtu damlote'n an lak mai theih tur a tam an ti. Blood donation camp uar turin pawl hrang hrang an ngen a, holiday-ah kher ni lo, lian tham lo deuh zawk pawha donation camp uar zel a tul thu an sawi a. Pawl ang ni lo, mimal ang pawha thisen pek uar thar zel turin Mizoram mipui an sawm a ni.