ZALEN June 19, 2026 : Mizo Language Development Board (MLDB) chuan niminah khan ATI Auditorium, MINECO-ah Mizo A, Aw, B siam rem leh a kaihhnawih chungchanga inrawn khawmna hun an hmang a, ‘Ng’ chu ‘H’ hma ah ni loin ‘N’ hnungah awm se, sikul zirlaibu chhut thar leh hunah pawh hman nghal tha an ti.

Inrawn khawmah hian Mizo A, AW, B ah hawrawp belh emaw, paih emaw neih tul an ti lo a. ‘Ng’ chu ‘H’ hmaah ni loin ‘N’ hnungah awm se, sikul zirlaibu chhut thar leh hunah pawh hman nghal tha an ti a. ‘G’ leh ‘J’ lam rik dan chungchang pawh ngaihtuah nghalin chiang lehzuala zir leh phawt ni se an ti.

Mizo A, AW, B a ‘G’, ‘J’ leh ‘O’ atanga intan thumal a lem nena Pre-Primary leh Pawl 1 zirlai-a chart-a dah tura tih a ni a, an thurel te hi MLDB Governing Body thutkhawm remchang hmasa berah chhawp chhuah leh a ni ang.

Inhmuhkhawmah hian kohhran hrang hrang Headquarters, Aizawl khawpui chhung leh pawna mite, Kohhran hrang hrang Publication Board te, Bible zirna college (Aizawl Theological College, Academy of Integrated Christian Studies, Salvation Army Officers’ Training College, Calvary Bible College, Apostolic Theological College) te, Bible Society of India, NGO hrang hrang (MUP, MHIP, Central YMA) te, MILTTA, Mizo Academy of Letters, Mizo Writers Association, Mizo Grammar Society, Padma Shree Awardee zawng zawng, prominent writer te, hemi kaihhnawiha Department hrang hrang (SCERT, Art & Culture, MBSE etc) leh Aizawl khaw chhunga University leh college hrang hranga Mizo zirtirtute sawm an ni.